PAGSUD niya sa Superbalita, 110 pounds pa ang iyang timbang, karon 190 pounds na. Apan ang iyang pagkamamugnaon isip dancer-choreographer padayong gidayeg ug gikahadlokan sa mga manayaway sa bag-ong henerasyon. Pila na ka higayon nga nikampiyon sa sayaw ang editorial department sa SunStar Cebu ug Superbalita Cebu ubos sa iyang paggiya. Karong bag-o, ang SunStar Cebu ug Superbalita Cebu na usab ang nikampiyon sa labing kinadak-an nga bangga sa sayaw sa Globe Telecom Annual Media and Bloggers Appreciation Party sa Cebu City Marriott Hotel niadtong December 1. Erwin Lirazan, Ssssuper Ka!
Unsa kahay nakapadaug ninyo sa Globe?
Nakuha namo ang dakong percentage sa choreography nga 50% (creativity, artistry, style and originality). Sa ubang criteria, nagligas ra: execution, 30%; costume, 10%; ug audience impact 10%.
Unsay inyong choreography?
Akong gi-mix ang mga gipausong sayaw sa una ni Francis Magalona kato iyang puppin dance nga mogamit og garter ug katong Thriller dance ni Michael Jackson. Bisan unsa nga stepping basta mohaum lang sa tukar. Nagbutang sad mi og suga sa garter nga special effects.
Pero wala mosiga ang imong suga?
Napilit sa scotchtape ang wire, paglangkat nako naibot pero padayon gihapon kog sayaw. Naningkamot gyud mi nga naa mi effects kay kahibawo ko lupig gyud mi sa sinayaway kay ang mga taga-CDN (Cebu Daily News) ug Freeman mga batan-on, abtik kaayo molihok.
Pila mo ka semana nagpraktis?
Tulo ra to ka adlaw! Supposedly, mag-start unta mi three weeks before sa actual competition pero wa mahitabo kay dili man mag-abot ang skedyul. Kaundangon na bitaw unta ko. Akong gihimo akong gisayaw ang stepping sa video then akong gipada kay duna man mi FB page. Ako silang giingnan nga, “Paningkamoti lang tawon ninyog tuon.” Tulo ra gyud ka gabii among praktis dinhi sa Superbalita, kawatkawat lang.
Ngano kaundangon man ka?
Kanang dili motunga sa praktis, unya nisakit akong dughan, abi nako na mild stroke na ko, pag-adto nakog Chong Hua, “Ostochondritis” ra diay. Nabun-og pag-sige og inat-inat sa kamot, nakalitan walay warm-up kay more on hand movement man mi. (Ostochondritis is an inflammation of the cartilage in the rib cage).
Unsay background nimo sa sayaw?
Since high school, member ko sa dance troupe sa Southwestern University. Kami regular backup dancers sa kanhi variety show nga “Etcetera” sa GMA-7 sa Skyvue Hotel pa sa una nga gi-host ni Ka Pedro. Actually, duha ra mi sa high school nga nasud sa dance troupe sa college nga giporma ni Mike Gonzales (kanhi sikat nga choreographer sa SWU) human sa series of auditions, mao to’y pag-uso sa breakdance way back 1980s. Kami ni-champion sa national summer dance contest sa Gaw.
Kinsay naka-influence nimo sa sayaw?
Kaliwat jud mi’g dancer, akong papa, akong maguwang kanang doktora nga naa sa Amerika, mao to’y no. 1 Hawaiian dancer sa Cebu sa una. Kami tanan managsuon manayaway. Nasulod sad kog Superbalita tungod ra pud sa sayaw.
Mao ba? Ngano man?
Pasko sad to, December 1993, gikuha ko ni Dodong Morallo (features editor) nga maoy mo-choreo sa editorial department sa SunStar kay mao may raket nako sa una. Akong gitudloan silang Alex Badayos (SunStar chief photographer), Miriam Limpag, Fionah Bojos (mga kanhi reporter)… ang editorial sa’y ni-champion sa ilang Christmas party. Pagka-next year, giablihan ang Superbalita, gipasuway ko og suwat per article, hangtod nga na-regular basis. (Si Erwin nag-alagad karon isip assistant sports editor sa Superbalita.)
Pero lately, nahilig ka sa songwriting?
First love gyud nako ang music before ko ni-focus sa sayaw, duna koy banda nga combo lata sa una. Karon nabalik akong love sa music. Katulo ko na-finalist sa Cebu Pop, finalist sad ko sa Hunino, Mega Cebu ug Against Child Trafficking.
Giunsa ninyo ang premyo nga P50,000 sa Globe?
Ang P1,500 among gi-Karaoke, ang P5,000 among gi-share sa Christmas party sa editorial, gikuhaan sab og P3,500 nga gasto sa costume ug ang nahibilin maoy among gibahin, tag-P8K. Merry Christmas jud!