ANG magsuong Tancontian nga sila Sydney ug Chino, malampusong mitapos sa ilang kampanya, human midaug og bulawang medalya ug most valuable player (MVP) awards sa 10th Jagsport Judo Championships nga gihimo sa Singapore sa nakalabay nga semana.
Si SEA Games 2017 judo bronze medalist Sydney, nga gikan pa sa pagdepensa sa iyang titulo sa University Athletic Association of the Philippines (UAAP) women’s judo mipildi sa teammate niya ug Singaporean nga kaatbang aron manguna sa women’s seniors division.
Niadtong 2015, si Sydney midaug og bulawang medalya sa under -19 +57 kgs division ug mihakot og bronse sa women’s under -23 division sa samang aktibidad nga gihimo sa Budo Academy sa Singapore.
Ang manghud niyang si Chino, nga miangkon sa UAAP junior’s division title, nanguna sa juniors division, gipildi ang iyang kaatbang nga pambato sa Indonesia ug Singapore alang sa bulawan.
Si Chino wa hinuon kasugakod sa Uzbekistan nga kaatbang sa men’s seniors’ division finals diin miuli lamang siya og plata.
Sama sa iyang ate, si Chino midaug sab og bulawan sa under-16 -66 kilogram division niadtong 2015.
Ang amahan nila nga si Paolo sa pakighinabi sa Sun.Star Davao, nagkanayon nga ang iyang mga anak nangandam na sab alang sa laing hugna sa kompetisyon alang sa 2018.
Alang ni Paolo nga mas molig-on ug mag-mature pa ang iyang mga anak sa mga kompetisyon nga salmutan niini.
“Kulang pa sila ng international exposure compared sa mga taga Uzbekistan and other countries. Pero, sa tingin ko mga four years from now kaya na nila makipagsabayan,” ni Paolo dugang sa paghinumdum kanila nga ipabiling prayoridad ang ilang pagtungha.
Human sa holidays, ang magsuon mobalik na sab og bansay alang sa umaabot nga Asian Games 2018 sa Jakarta ug Palembang sa Indonesia.