PERSONAL kining maong lindog. Apan ako kining gihimo aron lang mapahimangnoan ang publiko labi na ang mga opisyal sa gobiyerno kabahin aning mga mangingilad nga naggamit sa akong pangalan. Mao nga maka-ingon gyud ko nga popular na siguro ko kay sa makadaghan nga higayon gigamit ang akong pangalan sa modus sa uban aron lang makapangilad.
Usa ka tuig na ang nakalabay, adunay usa ka babaye nga miduol ni Camputhaw Barangay Captain Boy Lequigan kay nangayo og panabang gumikan kay nagsakit daw ang iyang amahan ug naa ma-confine sa Vicente Sotto Memorial Medical Center (VSMMC). Unya ang babaye nagdala sa pangalan namo ni Vice Mayor Edgardo Labella nga matod pa among gi-indorso ngadto kang Lequigan.
Una, niini adunay nadawat si Lequigan nga text message nga gikan kuno nako nga nag-hangyo kaniya nga tabangan ang babaye. Ug kay kaila man kami ni Lequigan iya usab kining gitabangan. Mihatag siya og kuwarta. Human niya og tabang sa babaye, nga nagapa-ila nga Roselyn Inoc, mi-text ang kapitan nako ug nagpahibalo. Natingala ko kay wala man ako mag-endorse og tawo ngadto niya. Ilad diay. Among gipa-entrap ang maong babaye ug nadakpan ug gikiha ni Lequigan og swindling.
Niadtong miaging adlaw, si Kalunasan Barangay Captain Nunilon Monares nanawag usab nako og nagpahibalo nga adunay babaye nga miduol niya nga nagdala gihapon sa among ngalan ni Vice Mayor Labella ug nangayo og panabang kay nagsakit gihapon ang iyang amahan ug anaa sa V Sotto. Nagpakita pa ang babaye og text message nga gikan kuno nako nga nag-endorse kaniya. Nakahatag ang kapitan og dakong kantidad kay nalouy lagi. Akong giingnan si Monares nganong adto man nako i-endorse kaniya nga dili man kami suod og kaila. Diay to, ilad dako.
Ako lang pahimangno sa publiko nga kon aduna modoul nga mga tawo kaninyo nga mangayo og magdala sa akong pangalan, ayaw ninyo og hatagi. O tawaga una ko sa DYSS (2338647/2338644). Ayaw pailad. (bobbygnalzaro@gmail.com)