USA ka tuig human gipirmahan ang kasabutan tali sa Dakbayan ug Probinsiya sa Sugbo kabahin sa 93-1 nga luna, nangutana karon ang konsehal ubos sa Team Rama kon unsa na ang kalambuan niini?
Disyembre 7 sa nakalabay nga tuig dihang gipirmahan ni Cebu City Mayor Tomas Osmeña ug Cebu Governor Hilario Davide III ang Memorandum of Agreement (MOA) sa binayloay og luna sa Dakbayan ug Probinsiya.
Si Konsehal Joel Garganera nagkanayon nga suportado sila sa 93-1, apan nakapangutana siya kon unsa na ang kalambuan niini?
Dugang ni Garganera nga basin og buhion ra ni Osmeña ang isyu sa 93-1 pipila ka buwan sa di pa ang piniliay ug himuon kini nga pamaagi aron makahakot og boto.
“We are for the 93-1, (pero) asa naman ta ron? Maningil ta ana. Iya na sad na i-resurrect inig hapit na ang election? Himuon na sad na niya nga election issue,” matod ni Garganera.
Mao usab ang pangutana ni Konsehal Raymond Garcia.
Dugang sa konsehal nga niadtong kampanya sa piniliay pa kini nga gipasalig sa mayor diin kaniadto niingon nga sulod sa unom ka buwan lang kini nga sulbaron apan kutob ra diay sa MOA signing.
Apan ang division chief sa Division for the Welfare of the Urban Poor (DWUP) Atty. Meriam Consuelo Fernandez nagkanayon nga naghuwat pa sila sa approval sa Commission on Audit.
Gibutyag usab niini nga usa ning pag-andam sa dokumento sa appraisal alang sa mga luna sa Dakbayan ug Probinsiya nga nakadugay.
Gusto sa duha ka local government unit (LGU) nga di ma disallow sa COA ang ilang himuong pagbaylo sa luna.
Dugang niini nga basin sa Enero sila makakuha sa approval gikan sa COA apan kon madugay pa gyud kini, mangita sila og laing legal nga pamaagi aron mas madali ang pagbaylo na sa luna.