BITBIT ang dagkong mga armas gipresenta sa kapolisan sa Police Regional Office (PRO)-Northern Mindanao ang lima ka mga giingong sakop sa New People Army (NPA) nga mibalik na sa sabakan sa gobyerno.
Mga alas 3 sa hapon niadtong Disyembre 5 mitahan una ang tulo ka mga sakop sa NPA ubos sa Secom 89 ubos ni Kumander Caesar nga mao sila Marlon Talisik, Rodulfo Talisik Jr., ug Bebert Damasco pulos taga Barangay Casisang, dakbayan sa Malaybalay, Bukidnon.
Ang ilang pagsurender gipasilitar ni Datu Jerry Magaling ug giubanan ni Police Senior Inspector Noel Cano gikan sa Public Safety Mobile Forces Company sa Bukidnon.
Si Marlon naghupot og armas nga 5.56 mine barret IG sniper nga adunay usa ka magazine ug pito ka buhing bala kini mokabtidad og P45,000.
Si Rudolfo adunay gisurender nga armas ngs MI4 sniper rifle nga aduna pay teleskopyo mobalor kini og P60,000.
Ug si Damasco adunay gisurender nga armas nga usa ka rifle carbine caliber 30 mokantidad kini og P20,000.
Giingong kining mga surenderee ang kanhi nalambigit sa pagpangilkil ug mga pagpangatake diha sa Bukidnon tuig 2014 ug 2015.
Niadto lamang adlaw’ng Lunes mga alas 10 sa buntag, duha ka laing sakop sa NPA ubos gihapon sa Secom 89 ang mitahan ug gilangkoban nila ni Arnel Salahag ug Mablet Timbangan pulos taga Canangaan, lungsod sa Cabanglasan Bukidnon.
Si Salahag misurender sa armas nga 12 gauge shotgun nga mobalor og P13,000.
Samtang si Timbangan mitahan sa iyang 12 gauge shotgun balor og P2,000.
Atol sa presentasyon sa lima ngadto sa sakop sa prensa niadtong Martes rason niining lima nganon nakahuna huna og balik sa sabakan sa gobyerno kay daw dili na nila masabot ang mga pamaagi sa walhong grupo ug daw gikapoy na usab sila sa pasalig sa ilang mga lider.
Sa iyang bahin ni Police Chief Superintendent Timoteo Pacleb iyang gibutyag nga nalipay siya nga nakahuna huna nga mosango kining walhong grupo balik sa gobyerno.
Giawhag pa niini ang mga kauban nga anaa pa karon sa kabukiran nga mosurender sab tungod kay gipasalig ni Presidente Rodrigo Duterte nga tagaan og ayuda ug programa ang mga NPA nga mobalik sa gobyerno.