MAAYONG balita alang sa mga pensioners sanglit ang Social Security System (SSS) naglaraw karon nga motanyag og pension loans sa tumong nga di na mapahimuslan ang mga pensioners sa mga loan sharks.
"Nakikita natin na nag-proliferate na yung mga institutions offering loans to our pensioners pero ang taas ng interes, so why not sa SSS na lang," suma ni Atty. Emmanuel F. Dooc, Presidente ug CEO sa SSS, atol sa press conference nga gihimo sa Ritz Hotel at the Garden Oases, Porras Street, Bo. Obrero ning siyudad, kagahapon.
Dugang ni Dooc nga giplantsa na nila ang guidelines alang niini ug gisumiter na sa komisyon.
Malaumon si Dooc nga maaprubahan kini sa di madugay, isip ayuda ngadto sa mga pensioners nga nag-ilaid sa pagbayad sa dagkong interes gikan sa gi-avail nilang loans.
Dugang branches
Aron sab maserbisyuhan ang nagkadaiyang miyembro sa ahensiya, gidugang ni Dooc nga magbutang sila og dugang branches apil dinhi sa Mindanao.
Sa kasamtangan ang SSS may kapin 36 milyones nga nga miyembro, nga subay sa istatistika 1 sa 3 ka Pinoy miyembro na.
Sa Mindanao may upat ka branches ang SSS, gikan sa 304 ka kinatibuk-ang ihap niini.
Ang baynte kwatro anaa sa abroad, samtang 279 gibahin-bahin sa nagkadaiyang parte sa Pilipinas.
Lig-ong panudlanan
Gikalma sab sa pangulo sa ahensiya ang kabalaka sa kadaghanan nga mabangkaruta na ang SSS tungod wa na kini pundo.
Gipasigarbo ni Dooc nga sukad siya milingkod sa ahensiya milambo ang koleksiyon ug kinitaan nila.
"Ang asset ng SSS is P509B more or less and that's the end of 3rd quarter ng 2017 pa, may increase compared last year."
Sulti ni Dooc nga may duha ka sources sa kinitaan ang SSS, kini ang gikan sa kontribusyon sa mga miyembro ug ang kita gikan sa investment.
"Sa contribution from the members umabot na tayo ng P169B and we expect to hit it more. While sa investment natin kumita tayo ng P28 to P29B, looking forward na it will hit P31B before the year ends."
"Tumatayo pa naman tayo," ni Dooc dugang sa pagsulti nga nangita sila og mas daghan pang pamaagi nga pabiling malungtaron ug padayong mahatag ang serbisyo ngadto sa mga miyembro.
Increase sa kontribusyon
Sa karon padayon nga gipaabot ang feedback labot giduso sa SSS nga pag-adjust sa kontribusyon ug maximum salary credit sa miyembro.
Enero ning tuig giduso sa komisyon sa SSS atol sa cabinet meeting ang 1.5 percent increase sa contribution ug increase sa maximum salary credit gikan sa P16,000 ngadto 20,000.
“What we did, we are pushing for the amendment of the charter. It was approved by the lower house early this year. And it is now currently pending before the Senate in the committee of Senator Richard Gordon."
Mindanao gitutokan
Luyo sa daghang hagit nga giatubang sa pipila ka branches sa SSS partikular sa kahapsay ug kalinaw, malipayon si Dooc sa trabaho sa mga personahe niini.
Niya pa, sa mga panahon sa emerhensiya, ang SSS unang motubag sa paggahin og ayuda sama sa biktima sa kalamidad ug giyera.
"On Monday we will give goods to our soldiers in Marawi, nasa P500K din yung worth. The big part of SSS's CSR project is sa Mindanao."
Luyo niini, may P5 milyones pa nga itunol nga tabang ang SSS, diin padayon pa nilang gi-validate kung kinsa nga ahensiya sa gobyerno ang hatagan nila niini. (Rhona Goc-ong-Villariasa)