UNA na nakong gipalutaw ang akong opinyon dinhi sa atong lindog ug sa akong programa sa DYSS Super Radyo kabahin sa plano sa “kanhi laos nga pulitiko” nga mohatag og cash assistance nga P50,000 sa pulis nga makapatay og kriminal atol sa iyang line of duty. Ang plano gisugat og kusganong pagsupak sa mga opposition councilors, taga simbahan ingon man ang Commission on Human Rights (CHR 7).
Ang maong plano, matod pa, makaengganyo sa mga pulis nga mopatay na lang basta-basta og kriminal bisan di angay nga himuon gumikan kay nag-apas sa ganti. Dili pod nato kalikayan nga mapugos ang kapulisan nga mopusil sa mga kriminal kay mamiligro man pod ang ilang kinabuhi panahon sa raid ug buy operations. Kay kining mga kriminal panahon nga ma-corner andam man usab silang mopatay ug magpakamatay.
Makadaghan na kita makadungog nga adunay mga pulis nga napatay o naangol kay naunhan sa ilang mga subject o target. Unsa may gusto ninyo mamatay ang atong mga pulis unya mabuhi ang mga kriminal gumikan kay atong gihatagan og gibug-aton ang kinabuhi sa mga badlungon?
Human sa mga pagsaway, gi-usab sa “kanhi laos nga pulitiko” ang iyang estratahiya. Miingon na siya nga dili kini cash reward kon dili legal support sa mga pulis kon pasakaan sila og kaso sa mga kabanaysa ilang napatay. Okey man ning maong tumong nga tabangan ang mga pulis nga nag-atubang og kaso nga may kalambigitan sa ilang official duty. Makalulooy ang atong mga pulis kay mogasto sa ilang kuwarta pagkuha og abogado.
Aron pagwala sa mga pagduda nga cash reward kini ug maka-aghat sa kapulisan nga mopatay kay nag-apas reward, mas maayo nga ang City Government na lang ang mobayad sa abogado sa pulis nga gikiha. O ba kaha ang Siyudad mokuha og mga panel of lawyers, hatagan og allowance aron modepensa sa pulis. Sa iyang ingon niini, dili na magka-problema ang atong kapulisan. Kining sugyot himoan og lakang ni Konsehal Raymond Garcia pinaagi sa pagsang-at og resolusyon. Atong huwaton kon suportahan ba usab kini sa mayor kay oposisyon ra ba ni si Garcia.