GIPUSIL patay sa iyang uyab ang 24 anyos nga babaye tungod sa selos sud sa lodging house diin sila nag-check-in kagahapon sa kaadlawon.
Kapulisan nitumbok sa suspek nga nalambigit sa drugas ug kanunay magselos sa babaye, kinsa gusto na untang makigbuwag kaniya.
Daling gidala sa tambalanan ang babaye sa mga staff sa lodging house sa Barangay Lagtang, siyudad sa Talisay, pasado alas 2:00 kagahapon sa kadlawon.
Si Supt. Jason Villamater, hepe sa Talisay City Police Station, niila sa namatay nga si Ronaneb Cabuenas, 24, taga Barangay Lagtang samtang ang gikatahapan mao si Jarry Parba, taga Tabunok, Talisay City.
Base sa pasiunang imbestigasyon, ang suspek unang niabot sa lodging house pasado ala 1:00 sa kadlawon. Si Cabuenas pasado alas 2 niabot.
Samtang didto na ang duha sa Room 14, nikanaug pagbalik si Cabuenas tungod kay gipadaplin ang motorsiklo nga iyang gisakyan nga nakaali sa agianan sa ubos nga bahin.
Apan pagsaka og balik, nadungong sa mga staff ang duha ka sunod-sunod nga mga buto sa armas ug dayon nigawas si Parba base sa kuha sa close circuit televison camera.
Ang kapulisan sa Talisay nakakuha og usa ka slug sa bala nga wala pa matino ang kalibre.
Samtang si Cabuenas nga nagkadugo na ug samdan sa dughan nga giingong milapos ang bala sa bukobuko, daling gidala sa Talisay District Hospital apan patay nang midangat sa tambalanan.
Ang cashier kinsa nihangyo nga di lang magpaila niingon nga suki na nila ang duha ug kanunay usab kini nilang madunggan nga mag-away.
Kini tungod kay gusto nang buwagan ni Cabuenas si Parba.
Si Salud Juarez, apohan ni Cabuenas, niingon nga minyo usab ang iyang apo apan buwag sa bana ug aduna silay duha ka mga anak nga atoa sa Mindanao.
Way trabaho ang iyang apo ug giingong panagsa ra usab moadto sa ilang balay sanglit nag-ipon na kini ug si Parba.
Gikompirmar usab sa mga paryenti ni Cabuenas nga kanunay mag-away ang duha tungod gihapon sa selos.