SUSPENDIDO ang mga klase sa kindergarten ug elementarya sa tanang publiko ug pribadong mga tunghaan sa lalawigan sa Sugbo kagahapon ug karong adlawa tungod sa bagyong Urduja.
Samtang, di mominos 25 ka mga barko ug fastcraft ang kanselado ang mga biyahe gumikan sa dautang panahon.
Ang amihanang Sugbo apil ang isla sa Bantayan ang gipaubos sa Tropical Cyclone Weather Signal no. 1 kauban ang Catanduanes, Camarines Sur, Albay, Sorsogon, Masbate, Romblon, Northern Samar, Leyte, Southern Leyte, Capiz, Aklan ug Northern Iloilo.
Ang bagyong Urduja gipaabot motugpa sa yuta sa Eastern Samar karong buntag, sumala sa Philippine Atmospheric, Geophysical and Astronomical Services Administration.
Si Alice Canasa, weather specialist sa Pagasa Visayas, nibutyag bisan kon dili moagi sa Sugbo ang bagyong Urduja apan magdala gihapon kini og katag ngadto sa halapad ug usahay kusog nga pagbundak sa ulan gumikan kay nasud ang Sugbo sa 200 kilometros radius nga rain band.
Matod niya delikado kini sa pagbaha ug flashfloods labi na ang kalit nga pag-awas sa tubig sa kasapaan.
Alas 4 kagahapon sa hapon, ang bagyong Urduja gibanabanang naa sa gilay-on nga 85 kilometros silangan habagatang-silangan sa Guiuan, Eastern Samar nga nagdala sa hangin nga may gikusgon nga 65 kilometros matag takna duol sa iyang sentro ug pag-unos nga moabot ngadto sa 90 kilometros matag oras.
Si Coast Guard Station Cebu Commander Jerome Cayabyab niingon kasagaran sa mga biyahe nga nakansilar kay paingon o gikan sa Ormoc, Maasin, Masbate, isla sa Camotes, Bantayan ug ubang bahin sa Leyte.
Ang Provincial Disaster Risk Reduction and Management Office nipasidaan sa publiko nga dili maglangay sa pagpauli gikan sa mga Christmas party, ilabi na kon nagpuyo sa mga dapit nga delikado sa pagbaha ug pagdahili sa yuta.
Matod ni PDRRMO Head Baltazar Tribunalo, bisan ug sa northern Cebu lang giisa ang signal number 1 apan dili angayang mokompiyansa ang mga dapit sa southern ug central Cebu nga kritikal usab nga mabahaan.
Kini sama nalang sa mga dapit nga nakasinati na ug pagbaha kaniadto sama sa Argao, Sibonga, Alcantara, Ronda, Malabuyoc, Barili, Pinamungajan, Toledo City, Carmen, Danao City ug Mandaue City.
Tungod sa ulan nga dala sa bagyong Urduja, nipasidaan si Tribunalo sa publiko, ilabi na sa mga tinun-an ug mga trabahante nga motambong ug Christmas parties nga dili maglangay sa pag-uli, ilabi na kon delikado sa baha ug landslide ang ilang gipuy-an.
Ang PDRRMO nga anaa karon sa orange alert, niandam na sa ilang mga kahimanan aron dali sila nga maka-responde sa mga dapit nga makasinati ug kakulian tungod sa bagyo.
Hinuon sa ilang monitoring, moderate rains lang ang nasinati sa kalungsuran lukop lalawigan.