NIADTONG Huwebes pa nagsugod pagpanghasi ang bagyong Urduja. Sa sinugdanan wa ko magtuo nga magdala ning bagyoha og kahasol dinhi sa ato.
Sama gud sa nanglabay’ng mga bagyo. Mangandam ta pero di man sab modayon. Motipas man. Hinuon minos ang dinala nga hangin sa Urduja dinhi sa ato pero ang ulan hilabihan ka puwerhisyo. Pun-an pa sa dagkong bawod nga nakapa-apiki sa daghang pasahero nga natanggong sa atong mga pantalan. Gahapon nisamot og gara si Urduja.
Nasuspenso ang klase sa daghang eskwelahan. Daghang tinun-an ang nahinayak og tunga unya nibalik ra sab sa agi. Pero sa dakbayan sa Sugbo way klase nga nasuspenso. Naabtan pa gani nako ang daghang ginikanan nga wa mamauli human maghatod sa ilang mga anak sa Cebu City Central School.
Ang ilang katarungan basin may order nga luwatan nga way klase. Pero paglabay sa usa ka oras way order nga giluwatan mao nga namauli ra sab. Dunay mga classroom nga sa 25 ka buok duha ra ang nitunga. Pero bilib ko sa maestra nga si Ma’am Marife Macabale kay iyang gipadayon ang klase.
Pero hibalo mo, sa mga ingon niini nga sitwasyon ang maayo di gyud klasehan mao kadtong tua sa bukid. Sa akong kasinatian daghan kung nakit-an nga mga tinun-an didto nga matumog sa ulan ang senina kung maabtan ug ulan samtang nagbaktas og tagpila ka kilometro. Wa pa ni labot sa katugnaw nga nanuhotsuhot sa ilang kaunoran. Mao na ang dakong kalainan sa tinun-an sa bukid ug dinhi sa patag. Naa pay sapa nga ubogon aron makaeskwela.
Stranded
Nangayo ko og lista kung pila ka pasahero ang natanggong sa atong mga pantalan. Kay gusto kung masayod kung pila sila ka buok nga atong ipamarayeg sa mga higala natong tubodtuboran. Basin may maluoy nga makahatod og pagkaon sa ilang nahimutangan sa Pier.
Di sayon ang ma-stranded sa dapit nga di ka taga didto. Samot na kung apiki ang imong budget. Nakasuway ko niadtong nangita pa ko og trabaho. Nibiyahe ko nga ang budget gikan sa terminal padung sa distinasyon.
Ang problema kay natanggong man ko og usa ka adlaw kapin kay di maagian ang karsada sa among ruta tungod sa landslide. Unya ang budget kay para plete raman. Puwerting paita. Ultimo para palit og tubig lisod.
Busa kamo diha nga mag Christmas party basin naay subra ang inyong budget. Sa di pa ang party; sulaye daw og suroy ang mga pantalan dala ang pinutos nga pagkaon ug tubig mainom. Unya pangutana sa guardia kung asa ni sila nagpundok. Sigurado ko nga hangpon nila og maayo ang dala ninyong grasya . Sigurado ko daghan ang gipang gutom nila. Pasko man ron nindot sab nga mopaambit ta sa atong grasya.