SAMTANG gipaabot makagawas sa nasod ang bagyong Urduja, laing potensyal nga bagyo ang mosud sa Philippine Area of Responsibility ug magdala og ulan sa Sugbo nga duol na sa adlaw sa Pasko.
Si Engr. Oscar Tabada, director sa Philippine Atmospheric, Geophysical and Astronomical Services Administration (Pagasa) Visayas, nipahimangno nga mas kusog pa sa bagyong Urduja ang low pressure area nga anaa pa nagpundo sa kasadpan sa Pacific Ocean.
Siya nipasabot ang LPA mahimo na nga tropical depression sa dili pa makasud sa Philippine Area of Responsibility samtang ang bagyong Urduja nana sa PAR mao pay pagkahimo nga Tropical Depression.
“Og depression na gani maoy pagsud sa PAR, dako pa kaayo ang tendency ana nga mo-intensify into a stronger tropical cyclone, napa man sa favorable environment,” dugang pagpasabot ni Tabada sa pakighinabi sa Superbalita Cebu kagahapon.
Siya niklaro nga daghan pa og mahitabo sa LPA nga mahimo moliko o mahilis base sa 23 ka modelo nga ilang gitun-an ug gibantayan.
Apan duna usab posibilidad nga mahimo kini nga severe tropical storm nga magdala og hangin nga may gikusgon nga moabot hangtod sa 120 ka kilometros ngadto sa 130 ka kilometros matag takna.
Kini makamugna na og storm surge, daghang matumba nga mga kahoy ug mapadpad nga mga balay nga gama sa light materials.
Kon masud sa PAR, tawgon kini og bagyong Vinta nga maoy ika 22 nga bagyo sa nasod.
Si Tabada nidugang kon basehanan ang tulo ka models ang bagyong Vinta matungod sa Kabisay-an sa Disyembre 23.