Tabac, Velez midomina sa BJMP Off Season Duathlon

SILA Elias Tabac sa Tagum Tribuddies ug Mildred Velez ang over-all kampeyon sa BJMP Off Season Duathlon niadtong Dominggo didto sa City Jail Road sa Ma-a.

Mioras si Tabac og usa ka oras ug 10 minutos aron modomina sa Men's Elite Category ug mabulsa ang P7,000, tropeyo ug gift packs.

Gisundan siya ni Jed Polistico sa Tinitarian Wild Cats gikan General Santos City sa 1:16:43 samtang ikatulo si April John Maniyog sa MCV55 Davao City nga mihuman 1:29:22.

Nadawat nila Polistico ug Maniyog ang P5,000 ug P3,000 sa maong han-ay.

Samtang, si Velez mibisekleta sa iyang mountain bike ug midagan sulod 1:41:41 aron makoronahan batok TRIAD's Dolly Yustre ug Reymalyn Guiterez sa sunod duha ka puwesto.

Si Rodel Bustamante sa Philippine National Police ang nanguna sa Lawmen category, 1:20:19 kontra Navy's Michael Nuyad (1:24:27) dayon si Fiscal Benjamin Uy sa Surigao (1:25:15), Jake Reyes sa CSG Regional Civil Security Unit 12 (1:32:24) ug Navy's Lt. Rhet Mark Likiyan (1:39:47).

Ang premyong kuwarta miabot sa kinatibuk-an P90,000 nga gitunol ni BJMP RO-XI Assistant Regional Director for Administration J/Supt. Ferdinand Pontilo, kinsang mipresenta kang BJMP RO-XI Regional Director J/SSupt. Amelia Rayandayan.

Ang paduwa gisponsoran sa Ulticon Builders Inc., Trail Outdoors, Podium Multisport Davao, Basecamp, Beach Break by Randy Pabatao, Dark Frog, Beach Camp, Bagani Active Wear, Bikerboy, Barracks Barbers and Shaves All In, Casa Estrella, Sabay sa Alon ug Citywide Cycling Association of Davao (CICAD).

Ang tanan natigom gamiton alang sa 'charity projects' sa BJMP RO-XI. (PR/MSR)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph