AKSYON, fantasy, horror ug musical ang pambato karong Pasko sa ika-43rd nga Metro Manila Film Festival.
Musical ang “Larawan” nilang Paulo Avelino, Joan Ampil ug Rachel Alejandro nga gibase sa estorya sa atong national artist Nick Joaquin.
Sa trailer, puno sa kantahan ug sayawan ang mga eksena ug atong makita kon unsay ikabuga ni Paulo Avelino nga sa atong nahibaw-an mokanta usab.
Makigtigi siya sa iyang duha ka leading lady nga pulos beterano sa kantahan ug sayawan.
Busa, sa mahilig sa musical, ang pelikulang “Ang Larawan” ang inyong unaha og tan-aw.
Nagtubo ug nagdako ko nga nagsunod sa “Shake Rattle & Roll” nga mga pelikula, ug maoy nagpauso sa 3 in one nga movie.
Apan karon nga nawagtang na kini ang Regal films dili mahimong dili mohimo og horror movie para karong Pasko kay maoy ilang naandan labi na para sa MMFF.
“Haunted Forest” sa trailer pa lang makadungog ka nag syinagitay, ug kulba sa gipakitang mga eksena nilang Jane Oineza, Maris Racal, Jameson Blake, Jon Lucas, Joey Marquez ug Raymart Santiago.
Apan bisan pa man, daghan gihapon ang gustong makita og balik ang trilogy horror movie nga “Shake Rattle Roll”.
Ako mismo gimingaw na sad sa maong pelikula nga naandan natong makita matag MMFF, siguro sa sunod puhon.
Bag-o ang partner ni Coco Martin sa Ang Panday, ang guapang beauty queen international Mariel de Leon, ang anak nilang Christopher de Leon ug Sandy Andolong.
Dili na bag-o para kay Mariel ang showbiz kay mao man kini iyang nadak-an uban sa mga celebrity nga ginikanan.
Imposible nga wala kini nakuhang talento sa pag-arte, ikaw kaha ang anak sa duha ka beteranong artistang Boyet ug Sandy siguradong naa sab sa iyang dugo ang abilidad.
Daghang mga kauban si Coco sa maong pelikula, kompleto ang mga batang makita nato sa teleseryeng “Ang Probinsyano,” gipangunahan ni Awra.
May Agot Isidro isip diwata ug ang labtim nga “mclisse” Macoy de Leon ug Elisse Joson, kauban sab nila dinhi ang mga beteranong Val Iglesias, Jonee Gamboa, Eddie Garcia ug Gloria Romero.
“Ang Panday” gikan sa Star Cinema ug CCM productions sa direksyon ni Coco Martin, karong pasko ubanan nato ang bag-ong adventure ni Flavio, ay’g saba!