4T ka mga pamilya gibakwit

NIABOT na sa 4,126 ka mga pamilya ang gipabakwit sa kagamhanan sa lungsod sa Daanbantayan gikan sa 20 ka mga barangay tungod sa bagyong Urduja.

Daghan usab sa mga dapit sa amihanan ang naigo sa bronwout.

Samtang sa dakbayan sa Sug­bo, pipila ka mga dapit ang na­kasinati og brownout human nangatumba ang poste ingon man natumbahan kini og ka­hoy tungod sa kusog nga hangin.

Matod ni Daanbantayan Mayor Vicente Loot nga 3,725 ka mga pamilya ang gipabakwit sa mga panimalay nga lig-on samtang ang laing 401 anaa gidala sa ilang gym, barangay halls ug tunghaan.

Gikompirmar usab ni Loot nga aduna’y parte sa provincial road sa Barangay Anapog ang nalusno human nihumok sa padayon nga pag-uwan.

Dugang sa mayor nga anaa sa 20 metros ang gitas-on sa maong dalan nga nahulga ug kasamtangan nga dili kini maagian og sakyanan.

Si Baltazar Tribunalo, pangu sa Provincial Disaster Risk Reduction Management Office (PDRRMO), nagkanayon nga nakig-coordinate na sila kang Loot aron matabangan ang mga biktima.

Dugang ni Tribunalo nga aduna’y mga nanga-stranded nga pasahero sa pantalan sa Hagnaya sa San Remigio nga namasilong una sa mga panimalay duol sa pantalan nga lig-on ang estraktura.

Sa lungsod sa Tabogon, amihanang Sugbo, 51 ka mga pamilya ang gihiklin ngadto sa mas luwas nga lugar gikan sa walo ka mga barangay.

Nagpadayon usab og hawan ang team sa Cebu Electric Cooperative (Cebeco) sa apektadong mga lugar ubos sa hurisdiksyon niini ingon man ang clearing o­perations sa mga lungsod sa Carmen, Borbon ug Sogod.

Dunay pipila ka mga lugar sa mga lungsod sa Tabuelan, San Remigio ang nakasinati og brownout.

Samtang sa dakbayan sa Sugbo, gikompirmar usab ni Quennie Bronce, tigpamaba sa Visayan Electric Company (VECO) nga nakasinati og brownout ang sagad sa bukirang bahin sa syudad.

Alas 3:00 sa hapon kagaha­pon dihang gibutyag ni Bronce nga aduna’y pipila ka mga barangay sa Cebu City ang apektado ang linya o poste niini hinungdan nga wala pa hingpit nabalik ang kuryente niini.

Apan nagsige na og trabaho ang ilang team aron mabalik dayon ang kuryente sa pipila ka mga dapit sa Busay, Taptap, ug Lahug.

“Lisod man gud i trabaho pud kon magsige uwan kay live wire man.”

“Overhead man gud ang atong facilities so di gyud kapugngan nga ma-affected sa hangin ug kusog nga uwan. But i-assure lang gyud namo nga deployed ang mga emergency crew sa nagkalainlaing lugar sa franchise area aron mohimo sa repair,” si Bronce nagkanayon.