NATANGGONG karon sa prisohan ang nagpaila nga bodyguard sa gideklarar sa korte nga mayor sa lungsod sa Tuburan nga si Daphne Lagon, human giingong nagpabuto kini sa iyang armas sa The Distillery Bar kagahapon sa kaadlawon.
Apan si Lagon wala pa pormal makalingkod sa posisyon tungod sa padayong legal nga away sa Commission on Elections (Comelec).
Ang suspek naila nga si Rey Isidro Arban, 40, lumad sa Malusgod, Duneas, Iloilo City.
Nisuway pa pag-ikyas si Arban apan dihang nisakay na kini og taxi, nakatulog kini ug dili mapukaw sa drayber hinungdan nga gihatod kini sa Mabolo Police Station.
Atol sa paghatod niini, anaa didto ang duha ka reklamante diin positibo nga gitudlo si Arban hinungdan nga gipriso kini.
Base sa inisyal nga pakisusi sa Mabolo Police, nasayran nga kuyog ni Lagon ang iyang mga sakop ug mga bodyguard, usa na niini si Arban, sa maong bar sa Brgy. Kasambagan, dakbayan sa Sugbo.
Giingon nga dili moubos sa 20 ka mga tawo ang ilahang grupo ug didto sila sa ikaduhang andana nagpahimutang.
Dihang nag-party ang mga customer sa bar, nagkaguliyang nalang kini og kalit pasado alas 2:00 sa kaadlawon.
Gisuwayan ni Lagon pag-uwang si Arban apan nibunot kini sa iyang .45 kalibre nga armas ug nagpabuto sa sawog diin naigo ang tiles.
Tungod sa gihimo ni Arban, nagkagubot ang bar ug daghang nangabuak sulod niini nga nagkantidad sumatotal og P50,000.
Atol sa insidente, gipakalma usab ni Jake Mendez, 43, ang iyang mga kauban apan kalit lang sila giduol ni Arban ug giingon nga gitiunan kini og armas.
Dihang nidangop sa Mabolo Police ang representante sa The Distillery Bar ug si Mendez aron magpa-blotter, naabtan nila nga nadala sa usa ka sakop sa police station si Arban human kini gidala sa usa ka taxi driver kay grabe ang katulog dihang gibiyahe kini.
Nakapakita si Arban sa iyang Permit to Carry Firearms Outside of Residence apan wala kini makapakita og firearm license.
Mag-atubang og kasong indiscriminate firing, alarm and scandal, malicious mischief, light threat ug illegal possession of firearms and ammunition si Arban.
Gitawagan sa Superbalita Cebu si Lagon aron makuha iyang habig apan, dili kini motubag.
Si Mayor Democrito Diamante niklaro nga siya pa ang naglingkod nga mayor sa Tuburan kay padayon pa nga gidungog sa Comelec en banc ang iyang giduso nga petition.
Kini ang iyang katin-awan human unang gituohan nga iya ang bodyguard nga namusil sud sa The Distillery Bar tungod kay nagpaila si Arban nga bodyguard sa mayor sa Tuburan.
“Dili na nako tawo oi! Dili sad ko maabtan og kaadlawon sa bar, dili sad ko magdada og bodyguard,” dugang ni Diamante sa press conference kagahapon. (Dugang ni SCG)