PERSONAL nga giinspeksyon ni Presidente Rodrigo Duterte ang mga lugar sa Eastern Visayas nga apektado sa pagkusokuso sa Bagyong Urduja.
Sakay sa chopper, nag-aerial inspection ang presidente aron personal nga ma-assess ang gibilin nga kadaot sa kalamidad.
Dinhi sa Sugbo, siyam ka mga lungsod ug usa ka siyudad sa amihanang Sugbo ang gideklarar sa Sangguniang Panlalawigan sa Sugbo nga ubos sa state of calamity atol sa regular sesssion niini kagahapon.
Ang mga lungsod naglakip sa Daanbantayan, Medellin, Sogod, San Remigio, Madridejos, Santa Fe, Bantayan, Tabogon, ug Borbon ug siyudad sa Bogo.
Ang Provincial Disaster Risk Reduction and Management Office (PDRRMO) maoy nirekomendar sa Provincial Board nga ipadeklarar ang 10 ka mga local government unit sa state of calamity gumikan sa kadaot nga gibilin sa bagyong Urduja.
Matod ni PDRRMO head Baltazar Tribunalo nga way namatay sa kalamidad apan dunay mga karsada ug pananom ang nangaguba tungod sa kakusog sa hangin.
Si Provincial Board Member Celestino “Tining” Martinez III niingon nga tungod sa deklarasyon makagamit na ang maong mga LGU sa ilang calamity funds.
Si Cebu Archbishop Jose Palma namulong nga angay mobati og kaluoy ang mga tawo ug motabang sa mga pamilya nga naapektuhan sa bagyong Urduja, labi na karong panahon sa Pasko.
“Unta ingon niini nga calamity atong heart mo think of those who are affected by the typhoon,” dugang sa arsbispo.
Ang artsidyosesis pinaagi sa Caritas Cebu magpadala og hinabang sa mga pamilya nga apektado sa kalamidad ug nanghangyo usab sa publiko nga mobuhat usab sa ingon.
Sa press briefing nga gipahigayon sa Naval, lalawigan sa Biliran, si Presidential Spokesman Harry Roque nipahibawo nga 31 na ang namatay samtang 49 ang padayon nga gipangita.
Matod niini, 23 ang namatay sa Biliran, lima sa Leyte, duha sa Eastern Samar ug usa sa Samar.
Samtang, 33 ang missing sa Biliran, 11 sa Eastern Samar, tulo sa Leyte ug duha sa Romblon.
Ang PDRRM Council nakatala og unom ka major landslides sa Biliran diin gikabalak-an nga mosaka pa ang gidaghanon sa mga nangamatay.
Si Health Secretary Francisco Duque III nipahibawo nga naggahin ang ilang buhatan og P4.5 milyones nga balor sa mga tambal alang sa Eastern Visayas.
Si Department of Social Welfare and Development acting Secretary Emmanuel Leyco nga dunay kinatibuk-an nga 608 ka evacuation centers ang gidangpan sa 44,000 ka mga pamilya nga namakwit.