Garcia: Senayang Pamagadya king Kapaskwan karing Kapampangan

“ALA neng kasingnyaman ing bibingka,
eku malyaring sumawa!
Aldo't bengi ambisna yang kanan ku,
e ku akwang masuya!

Baya king babo, baya king lalam,
e malyaring e takman!
Ay kanyaman, kanyaman, kanyaman, kanyaman, mmm, mmm, mmm!
Te me takman, takman me, takman me, takman me, mmm, mmm, mmm!

Ninu kaya’ing kinudta king bibingka?
Masampat ya pamangawa!
Gilingan ing abyas bang maging tapung,
kabukas ibabad ya pa!

Tamban me babo, tamban me lalam
nangnangan bagya-bagya!
Ay kanyaman, kanyaman, kanyaman, kanyaman, mmm, mmm, mmm!
Te me takman, takman me, takman me, takman me, mmm, mmm, mmm!

Nanu’ing magpanyaman kening bibingka?
Ing ungut kaya o’ing tsa?
Bagya-bagya ka king pamangandut - pota bina yang mabasa!
Pali king babo, pali king lalam
E me ananan apangan!
Ay kanyaman, kanyaman, kanyaman, kanyaman, mmm, mmm, mmm!
Te me takman, takman me, takman me, takman me, mmm, mmm, mmm.
Ay, bibingka!

~ Bibingka, Sapatyang lalang nang Miguel Serrano, 05.05.2001

*****

Bala kapilan pa ing milabas a Pasku uyan magpasku na naman ne, Kabalen! Ngana pin nitang dalit dalan--Pasku na! Pasku na, nananu nu ko pa? Kalame, tibuk-tibuk lalasang…e ta ne babalaus. Mapagsisti lang tagana deng kabalen tamu matwa’t anak.

Aplit na lang manyali keng panaun ayti reng Kapampangan lakwas na reng pengaring manyali para kareng anak da. Imalan, sapin at pyalungan a anting aginaldu da na para karela. Maralas mayumung pamangan at bungang tanaman ing panyaliwan da. Kanitang malagad la pa reng mansanas o “durugang” amanwan da, malagad la naman deng pibale-bale manapag mansanas inya sa’t ila reng tutuliran dang pakipamaskwan deng anak a makipag-aginaldu karing sibabale.

Ngening melubak na ing pamanangkat mansanas at aliwa pang pamangan kareng aliwang bangsa, e da no binang paniglon deng mansanas. Deng tau kasi keraklan nung sanung ala yang pantunan da.

Dakal na kareng pibale-bale ing mekasali nang ubi at abyas a lakatan kanyan pati na gatas a de lata, mayumu at ungut mu naman bang agamit keng pamangalame. Kilu-kilu ing sasalwan da at paruminggu pa makayadya na la reti. Ing uling mu naman a pakalanggotsi makalele namu naman bang agamit paglutung kalame, ale, misalubung o tibuk-tibuk. Subali la pa reng gagawang pastilyas mu naman. Magadya lang mayumu, gatas, pamalut at dalayap.

Ing dalayap magagamit ya balat anting pampabanglu at pampanyaman keng tibuk-tibuk at pati na pastilyas. Malgad la mung mananaman kareti inya lumibut ka pa kareng taldawa o mulang ating tanam dalayap.

Deng kawa milwal na la naman kaybat dang misimpan pabanwa pati na kudkuran ungut, gilingan, pugun, paleta o pangogo at pati na reng lyanerang datukanan kalame, leche flan, tibuk-tibuk at ale.

Manga atlung aldo bayu ing Pasku, makabau nang latik a lulutu da reng sibabale karing kabalantyan at sibabalen. Nung manintunan kang paruminggu Menila o aliwang lalawigan, mekad kasangab mu keng angin a magdala keng banglu ning latik e mu amanan ing miras na ka keng pibale-bale yu. Tanda na niti a aligaga no ngan balang makibale king pamagadya para king paratang namu namang kapaskwan.

Ati nong imalan at saping bayu keraklan ding pamilyang maki-agyu keng bye at sumangid nita, deng pakakalulu dakal ing mangalap la pa nung nu la mantun agyang dit mu mang salaping apanyaling pamasku.

*****

Dake Talabaldugan:

1. kile – (pangdiwa) makuyad a bwak-bwakan libutad ning kanwan at mata. English – eyebrow. Alimbawa king pamangamit: “Ing kile mamye yang miyayaliwang kapasyagan karing kekatamung mata.”

2. kilik – (panguri) pamibekut king papalwan karing bingut. English – carried against the side or the hipside with an arm as support to the one being carried, usually a child. Alimbawa king pamangamit: “Alumwan na ing alang patugut a kilik ning kambang nang Isang inya pane yang manikal papalwan.”

3. kilikid – (palagyu) puluput, balibid, kutun. English – winding of thread, yarn, string, twine, rope, wire, cable, around a reel or spool. Alimbawa king pamangamit: “Megutgut ya kilikid ing sinulad neng e la pakala-kalale deng maglambal.”

4. kilikili – (palagyu) lalam ning pago at libutad ding takde at salu. English – armpit, underarm. Alimbawa king pamangamit: “Atin taganang sasalingalngal kilikili kareng aliwang tau agyang kadilu-dilu da pa mu.”

5. kilig – (pangdiwa) galgal, kayungkung o kaligkig pauli ning biglang dimla, pamani o sasal/galigatsu. English – shiver; shudder; effect of convulsion. Alimbawa king pamangamit: “Ulata ing kilig nang Ana neng akakit ne ing kakaburi nang maglolo kaya.”

*****

PAMANGAPAMPANGAN: Ating amanung ating suglung kareng bibingka a gamit ing tapung king pamaglutu da. Ing “tapung” ya pin ing giniling a mabasang abyas—dapot e ya dikil tagana kareng bibingka—“malatapung.” Mangabaldugan a sasayu ya pa keng kilub dapot malutung ya o masanting ya pangalutu kilwal nung bibingka ya iti. Dapot kareng bungang tanaman—lakwas na reng mangga—mangabaldugan iting malutung la balat at manibalang la pa. Magagamit ya naman iti kareng dalaga. Sisti da kareng dalaga ing “malatapung” nung bubut ya pa o dalagita ya pa dapot mamanlag na ing timyas at legwan na.

*****

Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Nanu mang kutang o sisti dikil king Kapampangan a misulat king Kapisik, malyaring ikutang o malinawan king talasulat. Pakiparala king email address, garciakragi@yahoo.com. E ne pu makibat keng text ing Kapisik uling megamit ya lagyu keng kapamiraytan. Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me pamu, abe!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph