PIPILA ka adlaw human gi-ambush-patay si Ermita Barangay Captain Felicisimo “Imok” Rupinta, gibutyag dayon sa kapulisan nga ila nang na-ilhan ang mamumuno ug ingon man ang mastermind sa pagpatay sa kapitan. Tuod man, nadakpan dayon sila ni Jimmy Largo ug Jordan Gera nga, matod pa, apil sa upat ka mga tawo nga mibanhig sa kapitan.
Napasakan na og mga kaso sila si Largo ug Gera, kinsa hugot nga nanghimakak sa ilang kalambigitan. Apan giila sila sa partner ni Imok nga si Jocelyn Mendoza. Pero hangtod karon nga hapit nang usa ka buwan human gibuno ang kapitan, ang kapulisan wala pa mohingalan sa giingong mastermind.
Asa naman kining gi-ingon nga mastermind nga hangtod karon wala pa man makahingalan ang kapulisan. Hambog ra may nagdaghan aning PRO 7 Regional Director Jose Mario Espino. Bisan anino sa mastermind wala sila maka-presentar. Mas maayo aning Espino nga dili na lang magsige og sing-al kabahin sa mastermind sa pagpatay kang Imok kay puro lang pagarpar.
Sama sa akong giingon sa una natong mga lindog nga dili basta-basta ma-ilhan og mapasakan og kaso ang mastermind kon dili mo-piyaet ang mga gun for hire. Kay kon moangkon lang ang mga gun -for-hire sa nagsugo kanila, aw, maapil dayon og kiha. Sa kaso aning Imok, wala man gani mangangkon sila si Largo ug Geranga maoy nagpatay kang Imok labi pa nga dili sila motug-an kon si kinsa ang nagsugo ug nagbayad kanila nga ipapatay ang kapitan.
Wala pa man gani matumbok sa kapulisan ang motibo sa pagpatay kang Imok. Unsa man may kalabutan sa pulitika? Kabahin sa ribal sa mga organisasyon sa mga manindahay diha sa Carbon o kabahin sa kampaniya sa illegal nga drugas. Ako dili motumbok nga drug protector kadto si Imok. Wala lang siya magpakabana sa illegal nga drugas kay ang mga nahilambigit diha sa Ermita iya ra usab nga mga kabanay, higala ug political supporters. Sa dili madugay, ilubong na lang sa kalimot kining kaso ni Imok og magpabiling misteryo og tanghaga ang iyang kamatayon.
(bobbygnalzaro@gmail.com)