ANG barkong Swiss nga “Fleur de Passion” magsilbing labing unang langyaw nga barko nga mosalmot sa fluvial procession atol sa kapistahan ni Señor Santo Niño sa dakbayan sa Sugbo sunod buwan.
Gipahibawo sa Swiss Ambassador to the Philippines, Andrea Reichlin nga magsilbi kining unang higayon sa pagsalmot sa “Fleur de Passion” sa maong relihiyosong kalihokan sa nasud human sila gidapit sa organizing committee sa pag-apil.
“This is the first time that a boat with foreign flag will be joining the Sinulog,” matod ni Reichlin atol sa press conference kagahapon sa Cebu Yacht Club, barangay Pusok, Lapu-Lapu City diin gidunggo ang maong sakayan.
Sama sa ubang sakayan sa dagat nga moapil sa fluvial procession, di magpa-iwit ang 33-metros nga gitas-on sa kanhi German navy vessel nga mobutang og dekorasyon, dala ang imahen sa Sr. Sto. Niño nga gihatag ni Lapu-Lapu City Mayor Paz Radaza.
Samtang si Samuel Gardaz, vice president for corporate affairs Fondation Pacifique, nagkanayon nga nanukad pa sa Sevilla, Spain alang sa ilang upat ka tuig nga paglawig nga maglibot sa tibuok kalibutan.
Suwayan sab nila sa pagsubay sa rota nga gibiyahe sa Portuguese navigator Ferdinand Magellan ubos sa pagdumala sa Geneva-based non-profit organization nga Fondation Pacifique.
Si Magellan mao ang nakadiskobre sa Pilipinas sa 1521.
Mao usab kini ang nagdala sa Kristiyanismo dinhi sa nasod, labina sa Sugbo, nga naghimo sa pag-apil sa mao nga barko nga makahulogonan.
Ang maong proyekto ginganlan og “The Ocean Mapping Expedition” nga mohimo sab og pagtuon sa sitwasyon sa kadagatan.
“To help raise and spread awareness of the challenges resulting from human awareness of the challenges resulting from human impact on an environment,” saysay ni Gardaz.