ANG 18 ka mga stall nga namaligya og mga pabuto sa South Road Properties (SRP) nga maoy designated fire cracker zone sa siyudad sa Sugbo gipangsirhan human masuta nga namaligyag illegal nga pabuto.
Mihimog inspeksyon ang hepe sa Police Regional Office 7 nga si P/CSupt. Jose Mario Espino sa designated firecracker zone nga nahimutang sa SRP.
Uban ni Espino ang Regional Chief sa Civil Security Unit nga si P/Supt. Alan Servida aron masuta unsa ka luwas ang lugar nga gipanindahan sa mga pabuto.
Apan nakamatikod kini nga sa mga fireworks nga gi- display way nakabutang nga Philippine Standard mark sa mga produkto nga magpamatuod nga di imported nga produkto.
Dugang ni Espino nga wa usab mabutang sa label sa fireworks kinsa ang naggama sa produkto aron maoy manubag kun ugaling mahitabo ang disgrasya.
Nabantayan usab nga kadudahan ang mga fireworks nga gipangplastar sa SRP diin dunay mga marka nga inintsik sa luyong bahin niini.
Nakurat usab si Espino nga dunay mga imported nga mga pabuto ang gipang-display nga hugot nga gidili sa balaod.
Gipasakmit dayon kini sa hepe sa PRO 7 ang mga ilegal nga pabuto ug gihatagan lang una og warning sa pagkakaron ug dii pasakahan og kaso.
Mimando dayon si Espino nga pasirad-an lang una ang mga tindahan sa pabuto samtang di pa sila makapakita og ebidensya nga gigama lang dinhi sa nasud.
Ang mga produkto nga fireworks display nga matod pa hinimo sa Bulacan wa mabutangi kun unsa nga kompanya ang nag-manufacture nga usa sa mga rekisitos sa balaod.
“We will let the manufacturer to explain sa Regional Civil Security Unit why na wala yung PS mark at the same time yung manufacturers name duon pa lang makikita natin its a symbol na illegal” matod ni Espino. (AYB)