DUHA na lang ka katulog, ug Pasko na gyud. Nakapamalit na seguro mo para sa kaugalingon ug para ihatag.
Nakatayming kog sale ug nakapalit og usa ka butang nga makapawagtang sa usa ka childhood frustration. Manghinaut lang ko nga makab-ot nako ang pangandoy kaniadto sa umaabot nga tuig.
u25cf ● ●
Wa lang damha naapil ko sa listahan sa mga giimbitar sa ABS-CBN Manila nga motambong sa ilang giandam nga Christmas party alang sa taga media ug mga bloggers.
Walo ming taga Cebu ug usa nga taga Davao ang ninglayat sa kaulohan. Gisuroy mi sa mga studio diin adto himoon ang mga programa.
Niadto sab mi sa ABS-CBN Vertis Tent tapad sa bag-ong mall nga Vertis North. May mga baligya nga mga sinina, pagkaon ug ubang butang nga gipanag-iya, linuto o hinimo sa mga taga Kapamilya network pinangulohan ni Maam Charo Santos uban sa mga artista.
u25cf ● ●
Pagkaugma nihapit mi sa KidZania, usa ka proyekto sa ABS-CBN nga sa Mexico namugna nga morag usa ka syudad nga gipabagay sa mga bata ang gidak-on. Kini mohatag sa mga bata nga nag-edad og 4 ngadto sa 17 sa kahigayonan nga makabuhat sa mga butang nga sagad mga dagko lang ang gitugtan sama sa paghimog pizza ug ubang pagkaon, pagkapiloto, bombero, magsusulat, magsisibya ug uban pa.
Nalingaw ko sa higayon nga duna kunohay nasunog nga hotel ug nitubag sa alarma ang mga gagmayng bombero nga kompleto sa uniporme ug nipasirit sa mga bomba sa tubig nga gitaud na daan.
Gawas nga klaro kaayong nalingaw ang mga bata didto, seguradong daghan usab silang nakat-onan sa ilang kasinatian. Ang katuyoan sa proyekto aron makamugna ug mas maayong kalibutan alang sa mga bata.
Makaya ra sa bulsa ang bayranan aron makasinati ang bata sa KidZania. Hinaut nga may motumaw nga KidZania sa Cebu o sa laing dapit sa Kabisay-an.
u25cf ● ●
Sa Dolphy Theater gipahigayon ang Just Love Christmas Party. Ni-awit sila si Ogie Alcasid, Vin Abrenica, Clarisse de Guzman ug Darryl Ong. Nitimbaya si Jasmine Curtis-Smith.
Mga seen-vestigators sa I Can See Your Voice si Mitoy Yunting, John ‘Sweet’ Lapus ug Ogie Diaz (siya usab ang tigpaila) diin upat ka mga taga media sa kaulohan ang nakaapil ug nidaug.
Si Bianca Manalo ug Nicole Cordovez ang mga hurado sa Ms. Q&A diin unom ka mga ‘gwapa’ nga taga Manila ang niapil. May gi-raffle nga mga salaping Pilipinhon ug kadaghanan sa among grupo nasudlan ang bulsa ug pitaka.
Nalingaw mi ug nagpasalamat sa Kapamilya Network sa kahigayunan.