DAGHANG mga biyahe ang kanselado samtang liboan na usab ka mga pasahero ang stranded nga gusto unta mouli sa ilang probinsiya karong Pasko tungod sa bagyong Vinta.
Kagahapon dihang gipaubos sa Philippine Atmospheric, Geophysical and Astronomical Services Administration (PAGASA) ang habagatang Sugbo sa signal number 1.
Matod ni Commander Jerome Cayabyab sa Cebu Coast Guard nga wa nila tugoti ang mga sakyanan sa dagat nga mobiyahe tungod kay ang port of destinations niini gipaubos sa storm signal.
Alas 3 sa hapon kagahapon, niabot na sa 28 ka mga barkong pasaheroan, roro, ug cargo ang wa tugoti sa Coast Guard nga mobiyahe.
Samtang niabot sa 1,531 ka mga pasahero ang stranded alang unta sa mga biyahe paingon sa Bohol, Leyte, Negros Occidental/Oriental, Dipolog, Surigao, Cagayan, ug uban pa.
Duna usay mga bus nga padulong sa Negros Oriental, labina sa dakbayan sa Dumaguate ug Mindanao, ang wa usab patabuka gikan sa Sugbo.
Sa alas 5 kagahapon sa hapon nga weather advisory sa Pagasa, gipaubos sa signal no. 2 ang Surigao del Norte lakip ang Siargao Islands, Surigao del Sur, Agusan del Norte, Agusan del Sur, Northern Davao Oriental, Misamis Oriental, Camiguin, Bukidnon, Lanao del Norte ug del Sur.
Samtang signal No. 1 ang Southern Leyte, pipila ka dapit sa habagatang bahin Leyte, Southern Cebu, Siquijor, Bohol, Southern Negros Occidental ug Southern Negros Oriental, Dinagat Island, Misamis Occidental, North Cotabato, Maguindanao, parte sa Davao Oriental, de Norte, Northern Davao del Sur, Compostela Valley, Zamboanga del Sur, Zamboanga Sibugay, ug Zamboanga del Norte.
Matod ni Alice Canasa, weather specialist II sa Pagasa Mactan, sa Superbalita Cebu nga uwanon ang Sugbo karong adlawa.
Sa ilang forecast, gilauman nga mo-landfall ang bagyong Vinta sa Caraga, Davao Region kagabii o karong buntag.
Paingon sa kasadpan ang direksyon sa maong bagyo diin aduna pag-irog nga 21 kilometros matag takna ug nagdala og hangin nga 65 kilometros matag takna ug unos nga moabot sa 80 kilometros matag takna.
Dugang ni Canasa nga susama ra ang hangin nga gidala ni Vinta ug ni Urduja, apan mas paspas ang irog ni Vinta.
Gipaandam
Tungod sa kasaysayan sa landslide sa pipila ka mga dapit sa habagatang Sugbo, ang Provincial Disaster Risk Reduction and Management Office ni-abiso kanila nga magmabinantayon.
Ang mga local government unit (LGU) gitambagan pag-monitor sa bagyong Vinta sa ilang dapit ug mohimo og dinaliang desisyon labot sa posibleng evacuation sa mga nagpuyo sa landslide-prone areas.
Matod sa labaw sa PDRRMO Emergency Response ug Search and Rescue Division, Kathy dela Calzada, ang mga lungsod sa Malabuyoc ug Boljoon, kinahanglang magmabinantayon human nga duna nay kasaysayan sa landslide nga mugna sa uwan.
Sa brgy. Lower Beceril sa lungsod sa Boljoon, wa pa hingpit nahupay ang kabalaka sa mga residente labot sa posibleng pagdahili na usab sa yuta dinhi.
Gawas sa mga landslide, biktima sab sa mga pagbaha ang daghang dapit sa southern Cebu dihang niigo ang mga bagyong Queenie, Ruby ug Seniang niadtong 2014.
Gihimug-atan ni dela Calzada ang importansiya sa panag-alayon sa mga residente ngadto na sa mga barangay o kaha municipal ug city DRRM aron way masinating kakulian, taliwala sa bagyo.
Matod niya, importante nga paspas usab mo-desisyon ang LGU kon mopatuman og evacuation base usab sa sitwasyon sa ilang dapit aron kapugngan nga dunay matala nga casualty.