Binghay: Sekritong Santa Claus

IMBIS mangatawa ug magmaya pagbunotay sa tagsa-tagsa ka mga sekritong manito ug manita, nagkagubot ug nagkalalis na hinuon tungod sa P50 nga amotan para sa gasa. Dili na motampo ang uban  kay duna pay laing gitagan-an nga gastuhanan sa Pasko ug Bag-ong Tuig.

Tungod ini, nawad-an na og gana sa pagbinayluay og surprisang regalo. Nawala na sab ang tinu-oray nga katuyuan sa kasaulogan, ang pagmaya ug hudyaka kay matawo na ang atong manunubos.

Dihay usa ka Pasko niadtong dekada 70 nga di gyud nako malimtan kay ang gipangayo sa among kinamanghuran sa iyang sekritong Santa Claus gamitoy nga aparador ug mga sinena para sa iyang munyika.

Niadtong panahuna, wa pa ma uso and popular ug mahalaon nga Barbie Dolls, mga human daang gamit ug mga gagmay’ng sinena niini. Unya, mo lugsong ka pa og subra 10 kilometros sa poblacion sa Bogo.

Grabi ang paningkamot sa akong ig-agaw nga si Manang Rita nga maoy nakabunot sa iyang pangalan para matuman iyang gipanghandom nga pinaskuhan kay lagi wa pa may baligya niadtong panahuna.

Pag-abot sa bisperas sa Pasko nga nag iyahay na og inabrihay sa mga gasang nadawat, nakahilak ko og apil nagtan-aw kay misiga man iyang mata pag-abre sagol luha dayon naglukso-lukso sa kalipay kay 12 man ka buok ang kinamot nga tinahing sinena para sa iyang munyika nga binitay sa hinimong gagmay nga alambreng’ hanger sulod sa gamitoy nga pinanday nga aparador nga humot pang bag-ong silak iyang nadawat.

Ang gibuhat ni Manang Rita usa ka maanindot nga ehimplo sa tinu-oray nga Sekritong Santa Claus kay tanan iyang tinuyuan ug hinaguan nga gihimo para lang malipay iyang manito.

Ang nakuha nakong pagtulun-an mao nga dili tanang gasang mapalit og mahalaon mao ray makapalipay. Para nako, ang  tinuoray nga espirito sa Pasko mao ang paghatag og pagtagad og gasa sa  gugma.

Ang pagbisita, pagpanaygon og pagpakatawa nga makakahatag og kalipay sa mga nagkalisod, masakiton, edaran og mga na-ilo maoy tinuoray nga  gasa sa imong pagka Santa Claus.

Related Stories

No stories found.
SunStar Publishing Inc.
www.sunstar.com.ph