GISAWAY ni Mayor Tomas Osmeña ang bag-ong balaud nga nagtangtang sa income tax sa mga kawani nga nag-sweldo og P20,000 paubos ilawom sa Tax Reform for Acceleration and Inclusion (TRAIN) nga bag-ong gipirmahan ni Presidente Rodrigo Duterte.
Si Osmeña namahayag nga bisan ang mga kabos kinahanglan nga mobayad og buhis sa ilang kinitian bisan kon gamay ra nga kantidad.
“I believe that they should pay something like P20, P30 or P50,” padayag sa mayor.
Matod ni Osmeña kinsa nimando sa tag P5 nga bayranan sa mga drayber sa motorsiklo nga makalapas sa lagda sa trapiko pinaagi sa adjudication.
Gihulagway niya nga di maayo ang pipila sa mga provision nga nasukip sa Train nga mo-epekto sugod tuig 2018 nga iyang gihulagway nga makadaot sa nasod.
“We cannot teach them that way because they are poor, everything should be free, sayop gyud na. That’s poor management you’re teaching them the wrong values. It’s bad for our country,” nagkanayon si Osmeña.
Subay sa Train, gawas nga way buhis ang nagsweldo og P250,000 matag tuig, mosaka ang presyo sa gasolina ug krudo, dugang buhis sa mga sakyanan, coal ug sugar sweetened drinks sama sa mga soft drinks ug uban pa.
Ang buhis nga makolekta sa Train maoy igasto sa P8 trilyones nga proyekto sa imprastraktura sa kasamtangang administrasyon.
Sugod tuig 2018, ang produkto nga diesel buhisan og P2.50 matag litro hangtod mosaka sa P4.50 sa tuig 2019 ug mahimong P6 sa tuig 2020.
Ang Liquified Petroleum Gas (LPG) buhisan og P1 matag kilo sa tuig 2018, P2 sa 2019 ug P3 sa 2020.
Ang gobyerno mokolekta og P7 nga buhis sa matag litro sa gasolina, P9 sa tuig 2019 ug P10 sa 2020. (PAC)