DUL-AN sa 100 ka special permits ang giisyu sa Land Transportation Franchising and Regulatory Board (LTFRB) 7 sa mga bus ug minibuses aron dunay igong kasakyan ang mga pasahero nga manguli alang sa Pasko ug Bag-ong Tuig sa Sugbo ug Negros Oriental.
Si Ahmed Cuizon, director sa LTFRB 7, nibutyag nga moabot sa 66 ka special permits ang giisyu sa mga bus samtang 24 sa mga minibus.
Ang special permits gikinahanglan aron makalabyog ang publiko nga mga sakyanan gawas sa gitugot nga rota alang niini, aron makahakot og mga pasahero ug dili dakpon sa Land Transportation Office.
Matod niya lima ka operators ang nag-apply aron maisyuhan sa special permits.
Kini naglakip sa Vallacar Transit, Inc, ang kompaniya nga nagpadagan sa Ceres buses; Sugbo Transit Express; Island Autobus Transit Corp.; ug Metro Cebu Autobus Corp.
Ang mga special permit naglangkob sa mga biyahe nga manukad sa pantalan sa Dumaguete City paingon sa Cebu City, gikan sa Cebu City padung sa lungsod sa Daanbantayan, Cebu City paingon sa Hagnaya Port sa lungsod sa San Remigio, Cebu City padung sa pantalan sa Bato, lungsod sa Santander, Cebu City paingon sa lungsod sa Pinamungajan, Cebu City padung sa lungsod sa Tuburan ug Cebu City paingon sa lungsod sa Madridejos.
Kasagaran sa mga special permit balido sud sa 12 ka adlaw kun sugod karong adlawa hangtod sa Enero 3 duna usab unom ka adlaw kun kutob sa Disyembre 28.
Kinatibuk-an, 55 ka special permits ang giisyu sa LTFRB 7 alang sa mga bus ug 24 ka special permits sa mga minibus sa Vallacar, 6 sa Sugbo Transit Express, 1 sa Mabel Montenegro, 1 sa Island Autobus ug 4 sa Metro Cebu Autobus Corp. (SCG)