MASINATI sa mga konsumedor sa Metropolitan Cebu Water District (MCWD) ang 10 ka oras nga way supply sa tubig sa pipila ka mga barangay sa mga dakbayan sa Sugbo ug Talisay sugod sa gabii sa Disyembre 28.
Moabot sa 23 ka mga barangay sa siyudad sa Sugbo ug sakaon ug sudlunon nga mga dapit sa dakbayan sa Talisay ang makasinati og way agas sa tubig sugod sa alas 10 sa gabii hangtod sa alas 8 sa buntag sa Disyembre 29.
Apil na niini ang mga barangay Bulacao Pardo, Poblacion Pardo, Inayawan, Cogon Pardo, Kinasang-an, Basak Pardo, Quiot, Basak San Nicolas, Mambaling, Duljo Fatima, San Nicolas Proper, Sawang Calero, Suba, Pasil, Pahina Central, Pahina San Nicolas, Ermita, Kalubihan, Parian, Sto. Niño, Tinago, San Roque ug Kamagayan.
Si Charmaine Rodriguez-Kara, tigpamaba sa MCWD, niingon hunongon ang supply sa tubig sa maong mga oras aron paghatag og dalan sa ikaduha nga interconnection sa dagkong mga tubo nga naapektuhan sa nagpadayon nga pagtrabaho sa P638 milyones nga underpass project sa N. Bacalso Avenue, dakbayan sa Sugbo.
Matod niya naapektuhan ang mga tubo sa MCWD gumikan kay nagkubkob sa yuta ang contractor sa Department of Public Works and Highways nga maoy nagtrabaho sa underpass project.
Si Kara nipasabot nga kinahanglan isibog nila ang dagko nga mga tubo, putlon ug isumpay og balik aron dili mahugawan ang supply sa tubig nga mosubay sa maong mga tubo.
“Kinahanglan 10 hours tungod sa kadako sa pipeline. Huwaton nato ma-consume sa mga tawo ang tubig usa maka-connect, dili ta pwede makaputol sa pipeline kon daghan pa og tubig,” sumala ni Kara.
Moabot sa 146 linear meters ang gitas-on sa tubo sa MCWD.
Siya nidugang nga dili sila dihadiha makabalhin sa mga tubo kay mag-agad sila sa contractor sa DPWH kon mahuman na og kubkob sa yuta.
Si Kara nangayo sa pagsabot sa mga konsumedor bahin niini.