MAAYONG Pasko!!! Hastang daghana na gayud mga imbitasyon sa mga pakals (kaon) karong mga semanaha mga higala kay wala, tuo, likod ug atubangan adunay handaan!
Matod pa sa uban, kalami kung ingon ani pirmi ang kahimtang kay gawas sa bonus nga madawat sa kompanya, aduna poy daghang kwarta ug uban pang maayuhon nga madawat ta gikan sa mga paryenteg higala nga sa abroad ang mga obra.
Hayahay gayud sa tanang mandawatay, di bay? Ang mga kabataan gayud inig Pasko ang puno kaayo sa kahiman kay mapalitan silag bag-ong bisti apil ang mga duwaan.
Gani, makapangatang pa ang mga bata og mga maayuhon gikan sa ilang mga ninong ug ninang, gawas pa mismo sa ilang mga ginikanan. Hapi ug dagku ang ilang mga ngisi inig motambong sa party kay magdinulay pa sila sulod sa klasrum apil ilang mga titser ug mga klasmeyt nga nagpahiyum.
Apan ang reality (tinuod nga sitwasyon) dili tanan malipayon kada abot sa kasaulugan sa Pasko ug Bag-ong Tuig, igsuon.
Anaay mga pamilya nga mingawon og taman sa ilang paryente nga sa dili maayong sitwasyon ningpanaw ning kalibotan, igsuon.
Usa na niini ang mga nabiktima sa bagyong Urduja bag-ohay pa lamanag sa Biliran, mare. Daghan pod baya kanila nga doble ang mga kagul-anan nga ginaatubang sa kasamtangan kay dili lamang namatayan og kaparyentehan, naanod pa sab aha ang ilang kabtangan dala sa tibuok nila nga kabalayan.
Wala nay gamit ug kwarta- wala pa gayud makaon ug limpyo nga tubig mainum, miga.
Sa simpleng rason, nagbagutbot pod ang ubang ginikanan ug istudyante sa mga tulunghaan dinhi sa Davao del Norte, igsuon kay niadtong petsa 21 na mismo sa kabuntagon diin nagbisti na nag mga bata og maayuhon ug nagbitbit na pod ang mga ginikanan og litson usa pa nasayran nga gikansela ang party nila.
Wala na gipasulod sa tulunghaan ang uban ug sa naabot og sayo- gipauli na lamang kay hnagtod alas 9 ra sa sa buntag mahimo silang magtikaw-tikaw suds a eskwelahan.
Hastang palawa sa mga ginikanan ug mga bata. Instead nga “hapi” nahimo na hinuon silang “grumpy” kanang nagkulismaot sa kalagot bah!
In fairness sa sugo nga paulion ug i-postpone ang party sa mga tulunghaaan sa among probinsya, naningkamot ug nagtan-aw ra gayud sa kaayohan sa mga bata ang Department of Education nga ahensya.
Ang maong mando alang sa seguridad sa atong mga kabataan mao dili nato sila angayng kalagotan.
Unsaon na lamang kung tunga-tunga sa party mobaha hangtod liog, mare? Dilekado kung dili kita mosunod sa mando kay sa disgrasya gayud kita mobunggo.
Anyway, pwedeng hinungdan sa pagka-party pooper (makawalag gana sa kasadya) ang mga simpleng hinungdan sama sa panagbangi sa atong paryente ug silingan, pagkahurot dayon sa budget, trapik, walay bonus, gipulitika nga party kay gihap-an sa politiko diri sa among dapit, ug uban pa apan dili nato tugotan ang maong mga sitwasyon nga makadaut sa selebrasyon sa kapanganakan ni Hesus, igsuon.
Luyo sa maot nga sitwasyon, balik kita sa kamatuoran igsuon nga ang Pasko ang panahon nga kita magsadya tungod ang Mesiyas nahimuso ning kalibotan mao kita tanan makabaton og kaluwasan ug kinabuhi uban kaniya sa langit sa walay katapusan. Amen.