Mongaya: Maayong Pasko

NAABOT kami niining suoton nga mountain resort nga gipanag-iya sa pamilyang Lava diha sa Sitio Biasong, Bonbon, sa Syudad sa Sugbo nga tupad lang og maanindot nga parte sa sapa sa Mananga aron mag-Christmas party.

Tradisyon na kini sa among pamilya ug staff sa PRworks nga magpalahi sab og mga da­pit nga mas duol sa kinaiyahan.

Bugnaw ug limpyo ang palibot. Murag lasang na ang kabag-on sa kakayoyan ug mga tanom sa bakilid. Madungog nato ang kasikas sa tubig sa sapa nga naa ra sa tupad. Naay rapids ug makita nato ang usa ka gamay nga waterfalls sa unahan.

Sama sa caption sa mga hulagway ug video akong gi-post sa Facebook, nalipay ko nga naa sa tunga-tunga sa usa ka dapit nga layo sa kagubot sa syudad.

Bisan pa man, di nako malimod nga kining maong sapa nga murag usa ka birhen nakong nakita adtong tungora, giabusohan pipila lang ka kilometro gikan sa maong dapit.

Daghan na ang molabay sa ilang mga basura. Naa nay daghang mga quarry nga nagkubkob sa mga bas nga moresulta sa baha. Ug gisamotan pa sa pamulitika nga molingiw sa maong pag-abuso o naa pa ganiy aktibong nagduso niini.

Samtang grabi kalisod ang dalan padung sa maong tuyoon nga lugar, nagduhaduha sab ko kon maayo bang aspaltuhon kini.

Kon ninduton man gud ang dalan, atong malauman nga mas daghan ang makaadto sa maong resort ug makakita sa kaanindot sa sapa.

Apan nakahibawo na sab ki­ta nga uban sa kadaghan sa ta­wo, di malikayan kining mga abusado. Di malikayan ang mag­patakag labay sa ilang basura. Ang pagdagsang sa mga mangubkobay. Ug kining mga developers nga moguba hinuon sa natural nga beauty sa dapit.

Ocean mapping

Kining mga puntoha nakapahinumdom kanako sa diskusyon kuyog sa pipila ka mga langyaw nga scientist ug mga lider niining Ocean Mapping Expedition nga gisuportahan sa Swiss Embassy.

Nangutana man gud kining usa kanila kon unsaon pag-approach ang mga Sugboanon niining ilang mensahe kabahin sa pag-ateman sa kinaiyahan, di lang sa kadagatan.

Alang kanila, ang pagtarong og labay sa basura ug kining paggamit og recyclable nga mga gamit pananglit dako kaayog epekto sa kalimpyo sa kadagatan.

Apan alang kanako, layo pa sa mayorya sa mga Sugboanon nga mahimong kinaiya nga tarungon ang paglabay sa basura nga way nagbantay.

Bisan pa man sa mga information drive sa kagamhanan ug sa pribadong sektor, daghan pa gyud ang magpatakag labay basta walay nagbantay.

Hinuon, nagkasinabot mi ang dunay paglaom kon ipada­yon ang nasugdan na nga environment consciousness nga anha itudlo sa mga tunghaan. Mohangyo lang ko sa mga ginikanan nga mopatuo unta kini kon ang atong mga anak mao nay mobadlong kanato.

(@anol_cebu sa Twitter)

Related Stories

No stories found.
SunStar Publishing Inc.
www.sunstar.com.ph