SECTIONS
Wednesday, July 24, 2019

Garcia: Yari na ing Pasku, O nanu na? (Christmas is over? What now?)

“ING sabi ku king pusu ku, ‘Ume na ka, sibuknan da ka king tula; magtsaman-tasaman ka king sarili mu.

Dapot lawen mu, kapalalwan mu naman iti. Ing sabi ku king kayli, ‘Malintwang iti,’ at king nyaman, ‘Para nanu ing gamit niti?’Pigdulapan ku nung makananung apasigla ke ing katawan ku king alak—ing pusu ku antabayanan na ku king tanak—at nung makananung magkera king kamalyan, angga na king akit ku nung nanung mayap gawan para karing anak ning tau lalam ning banwa karing ditak namung aldo ning bye ra. Dinapat kung dakilang kararaptanan.

Menalakad kung bale at menasik kung mangulate tanaman para king sarili ku.

Ginawa kung mula at liwasan para king sarili ku, at temnaman ku la reting miyayaliwang mamungang impun.”

~ Ing Talapangaral, Dangka 2:Sunsi 1-26
(Ecclesiastes 2:1-26)

“Agyang king ayli ing pusu mekad manasakit ya, at ing kapupusan ning tula mekad lumbe.”

~Diparan, Dangka 14: Sunis 13 (Proverbs 14:13 )

”Ninu man yang alang pangagapus, ing e tutula ampat makatanggap yang mayap, at e maglumbe mu naman ampat makatanggap yang marok, masamas yang makabili king pantas a belwan.

Ninu mang agyu nang murung karing panamdam na karing bage ring panamdam, mengari king paung papalub karing dake katawan na king balat saklub na, masasanak yang anting tune makabili king belwan.

~Dalit ning Kakataskatasang Panginwan, Dangka 2: Sunis 57-58
(Bhagavad-Gita, Chapter 2, Verses 57- 58)

***

Milabas na naman ing Kapaskwan. Atlung dalan at anam a pulu’t apat na namang aldo na ing panenanyan bang mag-Paskung pasibayu. Bayung Banwa na naman ing pamatakaran tamu ba’tamung tumula’t magtampiso king pangsaguling tula, pangsinakurap a ligaya?nung man malyaring awsan iting tune ligaya.

Meyari na ing pamagtabugak at pamag-salwak-sabi ring keraklan kabang karing maluka ala yang pamiyaliwa ing aldo ning Pasku para karela.

Manguyud la pa mu ring karitun o manyikad kalawangnan a kolung-kolung bang manipun layak o basurang apamisali da keng suki rang mamunan a asna karagul panakitan nung iyambing ing pipipagalan dang kapurit a panakitan ba’la mung ating apangan at apapakan karing supling dang salunan at ditak mu apangan.

Pilan pamung penandit ing milabas, deng tau mapagal na la’t sinawa, nung e man, manila, king pamagpasasa king miyayaliwang pamangan at inuman, alak at mekad bawal a panulu. Ngeni, pakamulala la’t balu mung keng itsura da pa mu kalubkuban la pusu. Napnap la bulsa, napnap la palabyasan, napnap la pilubluban pauli ning sukdulang pamagtabugak umpisa na pa ning kapitangan ning kadwang pulu’t apat ning bulang kasalungsungan, at e pa kayabe ing pamagadya ra keta pa mung Oktubri, ay, keta pa mung Setyembri pala.
Dakal lang mengaslak mata ngeni at pakasulmuk namu at manisip pa nung nanung malyaring gawan bang napnapan ing palak ning milabas a Kapaskwan.

Bala nanapnap la namang king kapurit na mu lamang garapun. Pati dagis, ipas at salusad e da na buri mang taganan keng pigsawan da.

Antita mu naman ing pamagnapnap dang pilit deng keraklan king tula a pagnasan dang akwa keng kapaskwan. Mlayaring ligaya at tumula king Kapaskwan. Mu pin e king makalabwad a bage. Pasku man o ali, malyaring ligaya kapamilatan ning pamanyuyu at pamamatula king Apung Ginu.

Sanu mang lagyung yaus tamu Kaya, tunggen ta la mu ring Banal nang Lagyu at ing ligaya anamnam tamung tambing. Tambing!

***

Dake Talabaldugan:

1. kilíng¹– (palagyu) bwak ring kabayu. English – horse’ mane. Alimbawa king pamangamit: “Gagawan dang pinsil ing killing ibat karing ururan dang kabayu.”

2. kilíng²– (palagyu) bulino; kwayan alang buku. English – Bambusa vulgaris: spineless bamboo. Alimbawa king pamangamit: “Kiling ing gagamitan dang pangawang mangasanting a luklukan parala da aliwang bangsa.”

3. kilitî – (palagyu) lingapngap, kitik, kilikit. English – tickle, ticklish feeling. Alimbawa king pamangamit: “E na la ikwa kiliti reng meraklang malukang Maryu inya pin e ya mipuk keng alalan inyang milabas a banwa.”

4. kilo/kilu – (palagyu) balangkas pang-bubungan. English – cross-support for roofing. Alimbawa king pamangamit: “Matbud la reng ginamit dang dutung para kilu keng bale nang Ising inya tambing yang mibagsak ing bubungan ning bale na karatang ning masikan a bagyu.”

5. kilúb – (palagyu) lub, pilubluban, kabal;igtad ning kilwal. English – in, inside, interior. Alimbawa king pamangamit: “E tamu sukat mapanatul karing aliwa, uling ing Apung Ginu mu ing makibalu nung nanu ing ati yu kilub ding pusu ding balang lelangan Na.”

***

Iriyang Kapampangan: “Mamye kang dakal a tawad keng mumunang-diling sali keka, bang dakal ing panakitan king patingapun.” “Panigu” Yan ing yaus da ken gabling mumunang- dili deng mamaisali lakwas na keng palengki. Atin la pang panwalan a “mayan a panigu.” Mangabaldugan iting mipalad ya ing magtinda nung mayan ya panigu ing sali kayang mumuna.

Pamispis do pa kareng pamisali da reng “panigu” bang kanung misali ngan ing karelang tinda. Mekad kareng Isik da apulut iti reng kabalen tamung mamisali. Inya pin atin tamung katayang “suki” at “lugi” mu naman.

***

Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Nanu mang kutang o sisti dikil king Kapampangan a misulat king Kapisik, malyaring ikutang o malinawan king talasulat. Pakiparala king email address, garciakragi@yahoo.com. E ne pu makibat keng text ing Kapisik uling megamit ya lagyu keng kapamiraytan. Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me pamu, abe!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph