SECTIONS
philippines
Monday, September 20, 2021

Sugilanon: Hagit sa Pasko

Ernesto D. Lariosa
San Fernando, Cebu

NAKAHUKOM na siya. Kini ang resulta sa usa ka gabii nga tigi sa kahiubos ug sa pagpasaylo. Mibagting ang kampana sa simbahan sa lungsod timailhan sa pagka human sa ikaduhang misa. Miuban si Ricardo sa panon sa nanimba sa paggawas, apan miliko siya sa eskina padung sa merkado kay duna siyay paliton.

Nagkinagang siya karon sa iyang mga pinalit. Mitawag siyag traysikol. Mibirig si Rudy nga iyang suki.

Mibagiyos ang hangin nga mitabon sa iyang nawong. Kusog mopadagan si Rudy. Miliko ang traysikol. “Ayaw una, lahos sa ilang Angelo, pun-an lang tikag bayad, Rudy Boy.” Mitan-aw ang drayber kaniya nga puno sa kahibung.

Samtang nagdagan ang traysikol may nanuaw sa iyang handurawan. Ang pagbudhi sa iyang manghod ug sa iyang hinigugma nga si Nelly. “Unsa, nagtinabanay silang Angelo ug Nelly human sa drama?!” Sa maong balita mora siyag gituok. Buot mopahilayo ang iyang gininhawa. Nangisog siya aron di matumba, apan mihanap ang iyang panan-aw.

Sa iyang pagkamatngon diha na siya sa iyang lawak uban sa iyang ginikanan. Iyang nakita nga nagpangusmo sa kasuko ang iyang inahan. Ang iyang amahan mabalak-on nga nagtan-aw kaniya.

“Way tahod nga manghod. Nahibawo gyud siya nga uyab sa iyang maguwang gihilabtan pa gyud!” Singka ni Melay nga iyang inahan. Dugay niyang hinigugma si Nelly. Hapit dekada ang ilang relasyon nga tugob sa pagmahal ug pagsinabtanay. Naangkon na niya ang pagka babaye ni Nelly nga mao ang kinaguwapahan sa ilang dapit. Di siya makatuo sa nahitabo.

“Wa na tay mahimo, Lay, dawaton na lang nato ang nahitabo.” Mitutok kaniya si Papa Miguel nga daw naluoy kaniya. Milingiw siya. Giitlib niya ang iyang mga ngabil. Nagbasol siya nganong wa niya dawata ang papel sa leading man nga gitanyag kaniya ni Meling Gantuangko. Ipasundayag sa pista sa baryo ang maong drama, “Paglantong sa Dagat.”

Mibalibad siya tungod sa iyang trabaho sa siyudad. Usa ka higayon sa ensayo mitambong siya. Iyang namatikdan nga suod si Angelo ug Nelly. Yanuhon lag gakos si Nelly sa iyang manghod nga mokidhat niya. Si Nelly sad.... morag.....ah, pangabubho nga di angay patalinghugan.

Paglikay sa kagubot, mipahilayo siya ngadto sa kaulohan. Buot na sad niyang kalimtan si Nelly nga mabudhion. Mibad-as ang katuigan. Sa maayong palad naminyo siya og beauty queen nga buotan ug sulundon. Taga Sugbo ra usab nga nagtrabaho sa Manila. Nahimong Miss Ariel sa usa ka beauty competition. Nadani si Amparo kaniya tungod sa iyang kaambungan. Iyang gisaysayan ang iyang asawa sa iyang kagahapon. “Pasayloa na lang, Love, ang imong manghod. Hagit na nimo.Kay ikaw na may regional manager sa Sugbo sunod tuig. Mamauli ta sa Sugbo. Adto didto nato edukahon ang atong mga anak nga sila Mirasol ug Andy kay kuyaw dinhi sa Manila.” Wa siya motingog; nagdilaab pa ang iyang kalagot kang Angelo.

“Sir, nia na ta.” Gitagaan niyag tibuok papel de banko ang drayber. “Salamat kaayo, Sir.” Misirit kinig balik sa sementadong dalan. Usa ka simpol nga balay ang nia karon sa iyang atubangan. Nangayo siyag katahuran. Nanambo si Nelly, apan kalit nga nawa sa iyang panan-aw. Nauwaw?

Misaka siya. Sa hawanan nagbuy-od ang daot kaayo nga masakiton nga naghingutas. Si Angelo!

“Kanus-a pa ni iyang sakit, Nelly?” Si Nelly mitan-aw kaniya dayog duko. “Last week pa nga nahibaw-an nga kanser sa atay ang iyang sakit. Pila ka adlaw na ni siyang nagsuka. Hinginom man gud.” ni Nelly nga nagduko. Unya, inanayng mibuka ang mga mata ni Angelo.

“Brad, nia ko nagda sa imong mga paborito. Kombati, gyud!” Inanayng mipahiyom si Angelo.

“Merry Christmas, Brad!”gikuptan ni Ric ang kamot sa iyang manghod nga nagkaanam kabugnaw. “Nelly, andama ang mga dad-unon kay dad-on nato siya sa ospital karon dayon!” Pagtan-aw ni Ric pagbalik kang Angelo nagluha ang mga mata niini. Gipikpik niya ang abaga sa kanhing hinigugma nga natiguwang nang hitsura. Ahat nga pahiyom ang gisukli ni Nelly. (Katapusan)
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph