TUNGOD sa gilantawan nga tingsakay sa paghinangat sa Bag-ong Tuig, ang mga tinugyanan sa Cebu South Bus Terminal nanawagan ug nihangyo karon sa mga police station sa matag lungsod nga mag-deploy og personnel nga makatabang sa pagdumala sa trapiko.
Usa sa nakitang hinungdan nganong mangatanggong ang mga pasahero diha sa terminal mao ang kalangay usab sa pagbalik sa mga bus tungod sa grabeng traffic.
Gikan Disyembre 22 hangtud Disyembre 25, anaa sa kapin 131,000 ka mga pasahero ang gibana-banang nidagsa sa CSBT.
Kini base usab sa natala nga mga bus trips nga niabot og 592 niadtong Biyernes, 579 niadtong Sabado, 655 niadtong Domingo ug 556 niadtong Lunes, adlaw sa Pasko.
Apan matod ni CBST Operations Manager Joey Herrera, anaa sa 700 ang average bus trips nga ilang matala panahon sa tingsakay.
Ang pag-menus sa bus trip atol sa tingsakay pagsugat sa Pasko gitumbok ni Herrera nga tungod sa kalangay pagbalik sa mga bus gikan sa ilang biyahe sa habagatang Sugbo.
Sigun sa CSBT management, ang grabeng traffic maoy hinungdan nganong dugay makabalik ang mga bus ug maoy nakaingon nganong daghan ang mangatanggong nga pasahero diha sa terminal.
Niadtong Sabado, ang security manager sa terminal nga si Joy Tumulak, personal nga nihangyo sa Police Regional Office 7 nga mag-deploy og mga pulis nga makatabang pagbantay sa trapiko sa mga lungsod sa southern Cebu, butang nga gipatalinghugan dayon ni Chief Supt. Mario Espino.
Ang lungsod sa Minglanilla maoy gitumbok sa terminal ug bisan gani sa mga pasahero, diin nasinati ang grabeng kahuot sa trapiko.
Giingong way nakita nga mga traffic enforcer sa maong lungsod niadtong Sabado tungod kay nagpahigayon sila sa ilang Christmas party, nga gihimakak usab sa opisyal sa mao nga lungsod (lahi nga estorya).
Daghang mga netizen ang nakasaway sa mga traffic enforcer sa Minglanilla kay wa nila makit-i dihang naghuot ug wa na hapit makairog ang taas nga trapiko padung sa habagatan ug dakbayan sa Sugbo. (AZDL)