DUNAY mga naglimin nga istorya nga puno sa inspirasyon ang pipila sa 37 ka mga call center agents sa Survey Sampling International (SSI) Davao sa nasunog nga NCCC Mall niadtong Sabado.
Usa sa 37 ka biktima, nagbilin og usa ka kaagi nga makapakumot sa kasingkasing ug makapatulo sa luha.
Sa pakighinabi sa Superbalita, buot sa pamilya nga magpabilin una sila sa pagsubo ug sa ilang privacy hinungdan nga mihangyo sila nga di isulat ilang bansagon.
"Alas 6 sa buntag, Disyembre 23, pa-duty na siya, natingala kaayo ko, kay iyang gibilin ang iyang ATM nako, giingon niya ang password, kay nisulod daw ang grasya niya, ana iyang term, papaliton ko niya'g mga pagkaon pang-medya noche pagka-ugma kay mag-overtime daw siya," emosyonal nga pagsaysay sa 51-anyos nga inahan.
Dugang sa inahan, "Pag-uli daw niya, naa na daw ang pagkaon sa lamesa. Gigakos nako siya, kay sa akong tulo ka anak, siya ang bunso, mamasboy kaayo, nakatulo akong luha sa kalipay, na-feel kaayo nako ang gugma nga mura'g wala nay ugma," inahan nga nagpamahid sa iyang mga luha.
Sa laing pakighinabi, mibanaw sab ang luha sa mga higala ni Ivan Nebelle Roble, usa sa mga biktima sa sunog kinsa project supervisor sa SSI-Davao.
"Si Ivan man gud, kanang labaw pa siya sa imong mga igsuon gani, lahi ang iyang pag-love sa imoha as friend kayo, gituring na niya nga igsuon kaayo mo, buotan kaayo, ang iyang mga gipangsulti dili mahimo og walay word of wisdom," naghilak nga misaysay ang usa sa mga higala ni Ivan nga nahinabi sa Superbalita Lunes sa udto.
Miani sab og daghang likes, comments ug shares ang post ni Ivan alas 7:20 sa gabii niadtong Biyernes, pipila ka oras una ang sunog nga dunay hashtag nga #GoingOfflineForAWhile nga naghatud og lawom nga mensahe.
"2017 was a weird year, because I was somehow living my best life and worst life at the same time," ulahing post ni Ivan Roble usa sa mga namatay sa sunog.
DNA testing himuon
Padayon ang pagproseso sa mga patay'ng lawas sa 37 ka mga call center agents nga biktima sa sunog aron mailhan kini sa mga tagtungod.
Kini ang gibutyag ni Regional Crime Laboratory Office (RCLO 11) Officer-in-charge Police Superintendent Georby C. Manuel diin sa 37 ka patay'ng lawas, upat na niini ang nailhan sa ilang pamilya.
Sumala ni Manuel kung di na ma-identify ang mga patay'ng lawas sa mga biktima, moaginod na sila sa pagproseso sa genealogical DNA testing pinaagi sa mga medico legal aron mailhan kini.
Abag sa pamilya
Gipasalig ni Davao City Mayor Sara Duterte-Carpio nga moabag ang lokal nga kagamhanan sa Davao sa pagpalubong sa mga biktima, diin kini sab ang gipasalig ni Pangulong Rodrigo Duterte ngadto sa mga pamilya nga naa sa Southern Philippines Medical Center (SPMC) nga padayong nag-ila sa ilang mga kabanay.
Human sa identification process sa pamilya ngadto sa ilang namatay nga kabanay, ideretso ang minatay sa Cosmopolitan Funeral Parlor diin didto mag-desisyon ang pamilya kung dalhon ba sa ilang balay ang haya, puwede diha ang haya sa mga chapel sa Cosmo ug makapili sab sila kung buot nila kining ipailawom sa cremation.
Mipasalig sab og tabang ang tagdumala sa SSI-Davao ingon man ang NCCC Mall ngadto sa mga nahibilin nga pamilya sa 37 ka biktima.
Pahasubo sa Dabawenyo
Lunes sa hapon, Disyembre 25, midalit sa pahasubo si Mayor Duterte-Carpio kinsa maoy nanguna sa candle lighting ug flower offering gawas sa nasunog nga NCCC Mall.
Dungan sa mga siga sa kandila, mibanaw ang mga luha sa mga kabanay ug mga kahigalaan sa mga biktima sa sunog, ug mismong si Mayor Inday ang mihapuhap ug migakos sa mga inahan nga nagbakho kinsa nawad-an og anak sa mismong adlaw sa Pasko.
Sa social media, nagkatag ang mga pag-ampo sa netizens ngadto sa mga biktima, ug dunay pipila nga milab-as sa ilang panumdoman sa ilang mga kasadya sud sa maong Mall.
Trabante, ampingan
Atol sa press briefing ni Mayor Duterte-Carpio niadtong Dominggo didto sa City Hall, gibutyag niini nga iyaha nang gisultihan ang tagdumala sa NCCC Mall nga pangitaan og panginabuhian ug atimanon ang mga trabahante sa maong Mall nga sa kasamtangan nahunong ang trabaho.
NCCC Mall demolison
ARON malikay sa disgrasya, gimandu ni Bureau of Fire Protection (BFP) 11 director Sr. Supt. Wilberto Rico Neil A. Kwan Tiu nga demolison nalang ang 14-anyos nga NCCC Mall Davao human ang pipila ka porsyon sa maong four-storey nga establisyemento gilamoy sa kalayo niadtong Sabado.
"For now, I can recommend total demolition of this building. The damage is so much, the entire building is totally damaged except the ground floor," sulti ni Kwan Tiu kinsa nagbutyag nga dali nalang kining mahugno human masunog.
Adlaw'ng Dominggo unang nakit-an ang usa ka patay'ng lawas ug Lunes sa buntag napalgan ang laing 36 duol sa hagdanan sa SSI.
Ang Survey Sampling International (SSI), usa ka business process outsourcing (BPO) company nga naga-base sa Davao City ngadto sa laing kanasuran sa kalibutan.