SAMA sa gipaabot, ang pelikula nilang Vice Ganda ug Coco Martin ang nagtigi karon sa box office sa Metro Manila Film Festival.
Apan sa Enero 7, 2018 pa magpagawas ang komitiba og official result sa takilya inig kahuman na sa festival aron dili kuno maapektuhan ang mga entry nga gagmay og kita.
Dako ra ba og multa nga ipahamtang ang MMFF batok sa mga producer nga mag-una-una og post sa ilang kita.
Gikan sa P20,000 sa miaging tuig, mahimo na kuno ni karong P200,000.
Best Picture
Wala pa koy nakit-an bisan usa nga pelikula sa MMFF pero plano nakong unahon og tan-aw ang “Ang Larawan” nilang Rachel Alejandro ug Celeste Legaspi.
Ikaduha, ang “Deadma Walking” ni Joross Gamboa ug Edgar Allan Guzman.
Mao ning mga salidaha ang nakakuha og Gradong A sa Cinema Evaluation Board. Sa ato pa, taas siya og kalidad.
Dako sad ang posibilidad nga naa ra sa “Ang Larawan” ug “Deadma Walking” ang modaug nga Best Picture sa MMFF Awards Night nga gipahigayon na kagabii, Dec. 27 sa Kia Theatre.
Booo…
Sa 2018, wala na kunoy bayran nga buhis ang mga nagsuweldo og P21,000 paubos ang buwan. Yeheey!
Pero expected sad motaas ang tanang palaliton sa mosunod nga tulo katuig tungod sa dakong usbaw sa buhis sa krudo. Boo! boo!
Pananglit, ang pulta sa sine nga tag-P220, mahimo na unya nang P350 sa tuig 2020.
Unya, ang kuryente, plitehan, eskwelahan, ang pagkaon, medical… Samot daghan magkalisudlisud ani.
Dili man tanan dunay trabaho, so dili tanan makabenepisyo sa ilang tax reform. Paet!
Suwerte
Karong bag-ong tuig, unsa kahay maayong palihi aron mawa nang mga buaya diha sa gobyerno.
Bitaw, mag-ampo lang ta ug maningkamot nga hinaot buligan ta sa kahitas-an. Bisan unsay mahitabo, kinahanglan dili ta magpadaug sa mga problema.
Ang 2018 kay year of the earth dog. Suwerte kunong mga numero aning tuiga ang 3-4-9. Ang suwerteng mga kolor ang red, green ug purple. Ang suwerteng buwak ang rose ug orchids.
Wa ko moingon og suwertres ha, basin inyo nya nang tay-an. Pusoy gyud mo. Hehe..