LABING menos 38 ka mga tawo ang nangamatay sa 32 oras nga sunog sa upat ka andana nga New City Commercial Center (NCCC) mall niadtong miaging Sabado didto sa syudad sa Davao.
Lakip sa nangamatay sa sunog nga niulbo sa dayon nang pagsugat sa Pasko ang usa ka kawani sa NCCC mall ug 37 ka mga call center agents sa US market research company nga Survey Sampling International (SSI) Davao.
Giimbestigar pa sa Bureau of Fire Protection (BFP) ang hinungdan sa maong sunog ug nganong daghang mga kinabuhi ang nakalas. Ang departamento sa hustisya ug sa pamuo nipahibawo sab sa ilang managlahing imbestigasyon sa maong sunog.
u25cf ● ●
Makapatingkag sa atong dunggan ang sunog sa usa ka mall didto sa Davao tungod sa kadaghan sa mga mall dinhi sa syudad ug lalawigan sa Sugbo nga gihugopan sa libo ka libong mga tawo matag adlaw. Kinahanglang seguruhon sa mga tinugyanan nga luwas ang maong mga mall.
Sa miaging pipila ka mga tuig, nanurok nga morag uhong ang mga mall dinhi sa syudad ug sa probinsiya sa Sugbo. Sa ihap sa website nga everythingcebu.com, mokabat sa 50 ang mga mall sa tibuok lalawigan sa Sugbo, lakip na sa mga syudad sa Sugbo, Mandaue, Lapu-Lapu ug Talisay.
Apil na niini ang mga higanteng shopping mall sama sa SM City Cebu, Ayala Center Cebu, Gaisano Country Mall, SM Seaside City ug SM Consolacion.
u25cf ● ●
Sumala pa sa mga taho, ang sunog sa NCCC nagsugod sa alas 9:30 sa buntag niadtong Sabado ug napawong sa alas 5:15 sa hapon niadtong Dominggo. Kadtong nakalas na-trap sa sud sa building nga gihulagway ni Senior Supt. Wilberto Rico Neil Kwan Tiu, BFP regional chief sa Davao region, nga “an enclosed space with no ventilation.”
Matod pa niya kinahanglan pang maglungag sila sa sementado nga bungbong aron makagawas ang nagpuot nga baga ug makahilong aso ug aron makasulod ang mga bombero.
Apan maglisod ang mga bombero sa pagsud sa building tungod sa kainit nga miabot og 700 degrees Celsius. Samot nang di kagawas ang tua sa sud.
u25cf ● ●
Molihok lang kita kon duna nay mahitabo. Sa ginaingon pa, anha pa manguros kon gikilatan na. Tungod sa nahitabong sunog sa usa ka mall didto sa Davao, makapaabot kita nga ang BFP moinspeksiyon sa mga mall dinhi sa Sugbo.
Lakip sa ilang angay nga tan-awon mao nga duna bay fire exit nga kaagian padung sa gawas kon dunay sunog, kon motrabaho ba ang sprinkler system ug di ba kini dekorasyon lang, sakto ba ang ventilation ug duna bay fire evacuation plan.
Ug lain pang pangutana, angay ba nga ang usa ka mall butangan og usa ka call center.