PIPILA ka tuig na ang nakalabay, gi-expose ni Edgar Aninion, staff sa DYSS Super Radyo news, ang pagpangilkil sa mga pulis nga sakop sa Mobile Patrol Group sa nag-opeĀrate og peryahan sa Nivel Hills, Busay ning dakbayan sa Sugbo. Matag hinapos sa tuig adunay gyuy mag-operate og peryahan sa Nivel gumikan kay magsaulog man sa ilang tinuig nga pista ang maong sitio matag katapusang Domingo sa Enero.
Na-obserbahan ni Edgar nga matag gabii aduna gyoy patrol car sa MPG nga mobisita sa maong lugar. Anaa ra siya magpuyo doul sa maong lugar. Diay to nangubra sa ilang protection money sa operator sa peryahan. Nakuhaan pa gani niya og litrato sa iyang cellphone. Gireklamo ni Edgar sa investigation division sa PRO 7 ang maong mga pulis ug nasilutan gyud.
Sa pagsugod sa peryahan niadtong miaging semana, giduol na pod ang operator sa duha ka mga sakop sa Mabolo police station ug nangayo og protection money. Tres mil ang gipangayo matag semana ug usa ka sakong bugas nga Ganador. Niingon ang maong mga pulis nga gisugo kuno sila sa ilang hepe nga si Chief Inspector Clark Arriola.
Apan ang operator nakahimo og reklamo ngadto kang Arriola sa dihang mi-guest si Arriola sa programa sa DYSS. Nanghimakak si Arriola nga iyang gisugo ang maong mga pulis ug dili niya mahimo ang pagpangilkil.
Wala na mobalik ang maong mga pulis kay siguro gibadlong ni Arriola. Maayo ang gihimo ni Arriola.
Apan human niadto, diha na usay mga pulis nga miduol sa operator nga nagpa-ila nga taga R-2 division sa Police Regional Office (PRO 7) ug midemanda na pod og protection money. Ambot og taga R-2 ba gyud ang maong mga pulis kay wala man gani mohatag sa ilang mga pangalan. Maayo siguro nga imbestigahon ni sa hepe sa R-2 nga si Supt. Jonathan Cabal aron masuta kon tinuod ba gyud nga iya kining maong nga sakop. Porbida ning ubang mga pulis no, bisan gamay nga negosyo kilkilan pa gyud.
(bobbygnalzaro@gmail.com)