DEAR Dr. Fritz,
Maayong adlaw kanimo ug sa tanan nimo nga tigpanubay sa imong kolum sa Super B. Tawaga lang ko og Darna Gwapa. Nisuwat gyud ko nimo, dok, kay ako man gud nga nadunggan nga dili daw pwede magbasa basa human sa sex kay ma ansuyan. Mao nag human namo og sex ni mister, magpuyo ra gyud tawon ko. Karon, dok, atong niaging semana, naglisud man gud ko og pangihi ug sakit ang akong kilid. Mao nga nagpa-doctor ko, ug nakit-an nga anaa koy UTI. Ang problema kay giingnan man hinuon ko nga manghugas kuno ko human sa sex para malikayan ang magka-UTI. Unsa man gyud ang tinuod, dok? Unsa man gyud ang mga angay ug dili nako angay nga buhaton human sa sex?
Daghang salamat sa imong pagtubag. More power to you and God bless you always!
Darna Gwapa
*****
Dear Darna Gwapa,
Una nako nga ipangutana kanimo, asa man tawon ka nakabalo anang dili pwede magbasa-basa human sa sex kay maansuyan? Lisud gayud, Darna Gwapa, nga ang mogiya nimo buta, kay puniton gyud mo sa pansitan. Ayaw tawon og tuo-tuo dayon. Motuo gyud ka sa imong doctor kay eksperto man na siya ug iya na nga gitun-an.Tinuod na ang ingon sa imong doctor nga kinahanglan gyud ka manghugas human sa sex aron malikayan nimo ang UTI. Sa panahon man sa sex, ang kagaw gikan sa imong kinatawo, mabag-id diha sa pultahan sa imong pantog. Ug tungod kay ang tubo padulong sa imong pantog, dali ra kaayo kini nga lakturon sa kagaw gikan sa imong kinatawo. Pag-abot niini didto sa imong pantog, maghasik na dayon kini og lagim, mao nga maglain na dayon ang imong pagpangihi. Mao nang naa na kay UTI. Mao nga importante gayud ang pagpanghugas human sa sex, para dili ka mag-antos niining UTI unya.
Daghan pa unta kita ug istoryahan mahitungod sa usa nimo ka isyu kung unsa ang mga angay ug dili nimo angay nga buhaton human sa sex, apan tungod kay nagkulang na kita karon sa espasyo, tuguti ako nga pagahisgutan kini nato sa sunod pang edisyon ning atong patik. Hangtud sa sunod!
Dr. Fritz
*****
Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!