NASIKOP sa kapolisan ang usa ka iladong nalambigit sa ilegal nga druga sa manhunt operation ug pagtunol sa warrant of arrest diha sa Barangay Mohon, Tagoloan, Misamis Oriental.
Nagtingkagol na ang suspetsado nga mao si Florencio Cabillon, 38, minyo ug residente sa Zone-3, Barangay Katipunan, Villanueva, Misamis Oriental.
Sa impormasiyon nga nahipos gikabutyag nga nagpahigayon ang tinugyanan sa kapolisan sa Villanueva Municipal Police Station sa pagpangulo na usab ni Police Senior Inspector Rodney Gaid, Acting Chief of Police og manhunt operation hinungdan sa pagkasikop sa suspetsado.
Giingong gi-isyu ni Hon Marites Filomena Rana Bernales, presiding judge sa Branch 39, Regional Trial Court sa Misamis Oriental ang maong warrant of arrest nga adunay criminal case number CR-DRG-2016-1519 diin adunay girekomendang piyansa alang sa temporaryong kagawasan nga P200mil.
Samtang laing suspetsado usab ang nasikop sa kapolisan sa Balingasan Municipal Police Station sa pagpangulo na usab ni Police Inspector Ronald Espejon, Deputy Chief ubos sa superbisyon ni Police Chief Inspector Jolito Caseres, acting chief diha sa Barangay Poblacion 4, Balingasag, Misamis Oriental.
Ang maong dinakpan naila nga mao si Ryan Gochoco, 34, ulitawo ug residente sa nahisgutang dapit kinsa gaatubang sa kasong Homicide in relation to anti-hazing law nga adunay criminal case number 2002-69.
Ang warrant of arrest giisyu ni Hon Alfredo Cain, presiding judge MCTC, Balingasag-Lagonglong, Misamis Oriental ug wala’y girekomendang piyansa.
Sa pagkakaron ang maong maga dinakpan ang nagtingkagol na sa bilanggoan.