KIDAPAWAN CITY - Gidagit sa wala mailhing mga armadong lalaki ang deputy chief of police sa lungsod sa President Roxas, North Cotabato alas 8:05 sa gabii niadtong Huwebes.
Giila ang biktima nga si Police Inspector Menardo Cui Sr., taga Magpet, North Cotabato.
Gibutyag ni Police Supt. Bernard Tayong, tigpamaba sa Cotabato Police Provincial Office, samtang nag-inom ang biktima sa usa ka tindahan sa Barangay Poblacion, President Roxas uban ang iyang mga kaila sa diha nga kalit lang mibutho ang wala mailhing mga armadong lalaki dayon gitionan si Cui.
Pinugos nga gisakay ang pulis sa usa ka Toyota Pick-up nga walay plaka paingon sa hilit nga dapit sa President Roxas.
Dili pa matino sa kapulisan sa President Roxas kung si kinsa ang midagit ni Cui. Apan daghan ang nagtuo nga mga miyembro sa New People's Army ang midagit sa opisyal.
Sa kasamtangan, ang Cotabato PNP padayon nga nag-imbestiga sa pagdagit sa mga armado ngadto sa biktima.