Giklaro sa tag-iya sa usa ka birthing clinic sa lungsod sa Liloan nga wala nila balibari ang babaye nga nakaahat og panganak sa kilid sa dalan sa Barangay Yati.
Kagahapon, wala na mapugngi sa 34-anyos nga si Josephine Bico nga maabot sa Eversley Child Sanitarium & General Hospital, ug nakaanak kini sa kilid sa dalan sa Yati, alas 7:30 sa buntag kagahapon.
Matod ni Bico nga nahinabi sa Superbalita Cebu nga wala siya balibari sa Juana Maternity Clinic ug gi-refer siya sa ospital human nasuta nga kuwang sa buwan iyang gisabak base na usab sa iyang pre-natal records.
(Video sa aktwal nga pagpanganak ni Bico makita sa Facebook page sa Superbalita Cebu.)
Dugang niini nga wala na siya makapugong ug nahimugso niya ang iyang ika-upat nga batang babaye sa kilid sa dalan nga ginganlan niya og Rixie Janella.
Giklaro usab ni Dr. Theresa Herosa, tag-iya sa maong clinic, nga dili tinuod nga gibalibaran nila si Bico.
Dugang niini nga ilahang staff pa mao ang nitabang human nakaanak ang inahan ug dali kini nilang gidala sa ilang clinic.
Hinuon dihang nasuta nila, sakto ra diay sa buwan ang bata ug nasayop ra og ihap ang inahan hinungdan nga luwas ra ang bata ug dili premature.
Gatuo si Bico nga Enero pa siya manganak.
Luwas ang bata nga anaa karon sa Juana Maternity Clinic. /