PAIT nga tam-is. Kini ang paghulagway sa dagan sa natad sa isports sa Pilipinas sa 2017.
Naangkon ang bag-ong paglaum dihang ang Philippine Sports Institute (PSI) sa Philippine Sports Commission (PSC) milusad Enero 16 ning tuig sa programang palapdan pa ang 'grassroots sports development.'
Gibuhi sab sa PSI ang Children's Games alang Muslims, Christians ug Lumads sa Davao City niadtong Mayo.
Si Philippine Sports Commission (PSC) chairman William "Butch" Ramirez nagkanayon nga ang Children's Games nakahatag og kalingawan sa sobra 10,000 ka kabataan sa nasud.
Luyo sa Children's Games, ang PSI mihimo og serye sa consultative meetings, coaches' education, tribal games, talent identification ug sports science seminars, sa nagkadaiyang siyudad ug probinsiya.
Ang PSC-Pacquiao Amateur Boxing Cup, usa ka grassroots sports development program sa boksing ang gilusad sab ning tuig sa General Santos City diin may 14 ka duawong dapit una ang national championships.
Apan ang Philippine National Games (PNG) nga gi-iskedyul Disyembre 10 ngadto 16 sa Cebu ang gisibog sa Abril sunod tuig.
Ang Batang Pinoy Games Mindanao qualifying sa Oroquieta City nakansela sab tungod sa deklarasyon sa Martial Law, apan ang Batang Pinoy Visayas Games nahinayon sa Dumaguete City.
Si Rio Olympics weightlifting silver medalist Hidilyn Diaz sa
Zamboanga City miangkon og silver ug bronze sa 2017 International Weightlifting Federation World Championships sa Anaheim, California.
Nakakuha sab siya og silver sa 5th Asian Indoor and Martial Arts Games (Aimag) sa Ashgabat, Turkmenistan.
Naminghoy sab ang kadaghanan human gipildi ni Jeff Horn si Manny Pacquiao sa Battle of Brisbane via a 12-round unanimous decision aron makuha sa una ang WBO world welterweight title sa sinukmagay nga gihimo niadtong Hulyo sa Australia.
Ang taga-Davao City nga si Lee Vann Corteza mikampeyon sab sa bottleneck.net 77th World 14.1 Tournament, diin gipildi niya sila four-time champion Thorsten Hohmann sa Germany, 300-183, sa ilang titular showdown sa Steinway Billiards, Astoria, New York City, Oktubre 9.
Ang taga-Mintal midaug sab sa World Pool Series-Highrock Challenge, gipildi si Loli Wen sa Chinese Taipei, 11-3, sa finals.
Gibitbit sab pauli ni Corteza ang 2017 US Open Straightpool Championship title sa Table Magic sa Windsor Locks, Connecticut, USA human gipildi si Hohmann.
Si Jerwin "Pretty Boy" Ancajas sa Panabo City, nga nagsugod sa iyang amateur boxing career sa Davao City, napabilin ang iyang International Boxing Federation (IBF) World superflyweight title sa unom ka rounds nga duwa sa SSE Arena sa Belfast, Nobyembre 11, 2017.
Subli sab niyang depensahan ang iyang titulo karong Pebrero 3, 2018 kontra Israel Gonzalez sa Bank of America Center sa Texas.
Samtang ang Pilipinas anaa sa ikaunom nga pwesto sa 2017 Southeast Asian (SEA) Games sa Kuala Lumpur, Malaysia, mikolekta og 24 ka bulawan, 33 ka plata ug 64 ka bronse.
Ang pambato sa Davao nga si Rexor Tacay miangkon og silver samtang si Sydney Sy Tancontian miangkon og bronse sa SEA Games.
Ang Olympian boxer Charly Suarez sa Davao del Norte dunay bronse samtang ang Filipino-Japanese Mariya Takahashi, miangkon og bulawan sa judo.
Si chess national master (NM) John Marvin Miciano, 17, sa Davao City miangkon sa Fide master (FM) title human ang impresibo nga pagtapos sa 2017 Penang Heritage City International Chess Open 2017 sa Malaysia.
Suwayan na sab niya ang laing duha ka international master (IM) sa 2018 aron mahimo ng IM.
Sa Kadayawan sa Dabaw Festival invitational basketball tournament
sa Almendras Gym Davao City Recreation Center, ang De La Salle University (DLSU) Green Archers ug Far Eastern University (FEU) Tamaraws nagkarambol nga gikadismaya sa mga Dabawenyong nanan-aw.
Gipahibalo sab ni Davao City Mayor Sara Duterte Carpio, nga ang siyudad maoy host sa Alveo Ironman 70.3 karong Marso 25, 2018.
Luyo niini ang Davao City sab ang host sa Davao Region Athletic Association (Davraa) Meet 2018 ug 2019 Palarong Pambansa.
Mihakot sab og kadaugan ang ubang Dabawenyong atleta sa Palarong Pambansa, Private Schools Athletic Association (Prisaa) National Championship, Scuaa Meet, National University Games, SEA ParaGames.
Pagsaludo sa tanang atleta! Happy New Year!