NAANDAN na nato ang pagbalik-lantaw sa mga nahitabo sa atong palibot matag tapos sa tuig ilabi pa kun mga isyung kitang tanan angayang masayod.
Enero 5, gitaas sa kapulisan sa Davao del Sur ang ilang alerto human mipuga ang kapin 100 ka mga pinereso didto sa North Cotabato District Jail human nakadawat og impormasyon nga mitago sa lalawigan ang uban kanila apan nasikop dayon ang pipila kanila atol sa manhunt operation.
Enero 30, naundang ang mga buy-bust operation sa kapulisan lukop nasud dihang gimando ni Presidente Rodrigo Roa Duterte ang pagbawi sa gahum dihang nalambigit ang ubang sakop sa Philippine National Police sa pagdagit sa Koreanong si Jee Ik Joo tungod sa Oplan Tokhang.
Napungot si Duterte human nahitabo ang pagdagit ug pagpatay sa negusyanteng Koreano sud mismo sa Camp Crame niadtong Oktubre 2016.
Pebrero 2, gilusad sa lalawigan sa Davao Occidental ang pinakaunang Provincial Anti-illegal Drug Summit nga gipamunuan ni Governor Claude Bautista.
Mga opisyal sa 105 ka barangay ang misalmot apil ang mga mayores sa lima ka munisipyo nga giayudahan sab sa departamento sa interior and local government.
Sa maong summit namugna ang programa sa gobernador nga Aksyon Druga-Igsoong Nagtinabangay para sa Gugma (Auding Plan).
Sa samang gi-organisa ni Mayor Joseph Peñas ang Drug Victim of Digos (DVD) tumong nga makatabang kini sa pagsumpo sa illegal nga druga sa dakbayan.
Pebrero 22, nahitabo ang sorprisang drug test sa 171 ka mga sakop sa Malita Police Station didto sa Davao Occidental human miabot sa lugar ang mga sakop sa Regional Crime Laboratory Office (RCLO) apan way bisan usa ka pulis ang nag-positibo pagamit og druga.
Marso 7, dihang miguwa ang warrant of arrest gikan sa Regional Trial Court Branch 19 nga nagmandong dakpon ang self-confessed Davao Death Squad nga si Edgardo Matobato kinsa gitudlong maoy buot mopatay kang retired Department of Agrarian Reform (DAR) Adjudicator Abeto Salcedo Jr. niadtong Septembre 15, 2016.
Nailhan si Matobato sa biktima human mitambong sa Senate Inquiry didto sa Manila nga nasaksihan sa telebisyon.
Marso 9, nahitabo ang mangilngig nga hitabo sa kurbadang parte sa Barangay Sibayan, Bansalan, Davao del Sur human gi-ambush patay ang upat mga pulis nga mo-imbistiga og krimen sa lugar.
Namatay diha-diha sila si PO1 Rolly Benelayo nga drayber sa patrol car, PO1 Joe Narvaza, PO1 Saro Mangutara ug PO3 Jayden Rabor nga sakop sa Scene of the Crime Operatives (SOCO), swerteng naluwas sab si PO3 Allen Arnado.
Marso 13, gidagit sa mga rebeldeng New People’s Army (NPA) si Kagawad Luis Angos didto sa Little Baguio, Malita, Davao Occidental.
Misuway sab pagpuga ang upat ka pinereso sa Digos City District Jail nga sila si Joenel Arana, Daniel Camingawan, Joseph Maldan ug Joven Coca niadtong Abril 20.
Nadunggaban niadtong higayona si Senior Jail Officer 3 Erwin Pantojan human naghupot og mahait nga hinagiban si Arana apan wa molampos pagsibat ang mga suspek nga gilayong nasikop sa mga jail officers.
Abril 29, naalarma ang katawhan sa lungsod sa Sarangani, Davao Occidental human mitay-og ang magnitude 4.1 nga linog apan giingong aftershocks lamang kini sa magnitude 7.2 nga linog didto sa General Santos sayo sa kaadlawon.
Buwan sa Mayo, nagpakita og pwersa ang mga rebeldeng NPA human gisunog ang usa ka 10-wheeler truck sa negusyanteng si Henry Sorongon didto sa Cabligan, Matanao, Davao del Sur, petsa 19 sa buntag ug ekstorsyon ang anggulo sa krimen.
Mayo 23, apil nga naalarma ang ubang katawhan human gilagdaan ni Pangulong Duterte ang Presidential Proclamation number 216 nga nagdeklara og Martial Law dinhi sa Mindanao.
Kapulisan ug military nagbutang og mga checkpoint sa lalawigan. Ang Martial Law nga matapos unta karong tuiga gilugwayan pa hangtud Disyembre 31, 2018.
Mayo 27, ang Sandiganbayan nagpagawas og desisyon nga ipadayon ang trial ni kanhi Davao del Sur Rep. Marc Douglas Cagas IV sa pork barrel scam.
Si Presiding Justice Amparo M. Cabotaje Tang sa 3rd Division sa korte, nagbasura sa ‘motion to quash’ sa opisyal niadtong Hunyo 11 sa kasong graft and malversation.
Giapil sab sa maong kaso ang amahan niining gobernador.
Buwan sa Hunyo, gialerto sa kapulisan ang mga hotel sa lalawigan nga bantayan ang ilang mga guest human nahitabo ang pagpaarak sa usa ka lalaking suspek didto sa Resorts World Manila nga gikamatay sa 38 ka mga tawong nalumos sa aso ug gikaangol sa laing 70.
Sa maong buwan sab gibantayan nga di makasud dinhi ang mga mikuyanap nga pekeng bugas.
Hulyo 1, malinawong gisaulog sa Davao del Sur ang ika-50 nga bulawang anibersaryo ug pinasidunggang bisita si Presidente Rodrigo Duterte nga subling mitambong sa ika-64 nga Araw ng Hagonoy, Davao del Sur niadtong Hulyo 4.
Buwan sa Agosto, nahimong kontrobersiya sa siyudad sa Digos ang gi-aprobahan sa Development Bank of the Philippines (DBP) nga P400-milyones nga giutang sa lokal nga gobyerno aron matukod ang commercial building sa karaang merkado ug ang uban ipalit og mga ekipo.
Gisakyan sab kini sa mga kritiko sa administrasyon kinsa nipasiatab og mga bakak nga P1.4-bilyones ang giutang sa siyudad.
Agosto 24, nakurat ang mga molupyo sa lungsod sa Jose Abad Santos, Davao Occidental, human gipatay sa amahan ang iyang 2 ug 4-anyos nga anak didto sa Sitio Kimalibay, Barangay Meybio.
Napungot ang suspek nga si Jojo Basyao, 27, kay nagpunay og hilak ang mga bata dihang milayas ang inahan niini.
Septembre 8, napuno sa hudyaka ang ika-17 nga Araw ng Digos nga gitambungan sab ni Pangulong Duterte ug mi-anunsyo nga mohatag siya og P200-milyones aron mahimong moderno ang city hall building ug ipaayo ang city gymnasium karong sunod tuig.
Septiyembre 21, gideklara sa Malakanyang ang ‘National Day of Protest apan nahimong malinawon ang Davao del Sur ug Davao Occidental kay wa’y lihok protesta nga nahitabo.
Kini sab ang adlaw nga gihandum ang 45-anyos nga Martial Law kaniadto sa diktador nga si Presidente Ferdinand Marcos.
Oktubre 15, gitaas sa kapulisan sa duha ka lalawigan ang ilang alerto human giingong napatay na ang duha ka mga Abu Sayaf leader nga sila Isnilon Hapilon ug Maute group leader nga si Omar Maute didto sa Marawi, kini aron di makalusot ang ubang sakop sa lalawigan aron manimawos.
Nasubo sab ang mga kaparian sa Davao del Sur ug Davao Occidental human namatay ang iladong taas nga opisyal sa Simbahang Katoliko nga si Cebu Archbishop Emeritus Ricardo Vidal sa edad nga 86.
Gihangop sab sa mga opisyal sa Davao Occidental ang pag-bisita ni Davao City Mayor Sara Duterte sa usa ilang mga aktibidades niadtong Oktubre 23, pipila ka adlaw una gisaulog ang ikaduhang tuig sa kamugnaan sa probinsya niadtong Oktubre 28.
Oktubre 29, duha ka tinun-an ang namatay human gi-ambush sa mga bandidong B’laan ang truk nga gisakyan sa mga tinun-ang mitambong sa ‘Damsu Festival’ sa Kiblawan, Davao del Sur ug kasamtangang gikasohan na ang mga suspek.
Nobyembre 2, gipakita sa Philippine Drug Enforcement Agency (PDEA) sa Rehiyon nga gihimo nila ang tahas nga gisangon kanila sa pamuno nasud ug nasikop ang usa ka kawani sa engineering department didto sa Barangay Kinanga, Don Marcelino.
Si Christopher Banot, 41, taga Barangay Lawa sa lugar, naaktuhan nga nagpayuhot og gidiling druga, asoy sa PDEA.
Nobyembre 21, nakurat ang mga molupyo sa Barangay Kiagot, Digos City, human nakit-ang nagbitay sa Sitio Lantawan, ang usa ka 20-anyos nga tinun-an sa Cor Jesu College ug molupyo sa Barangay Aplaya. Depresyon ang gilantaw’ng motibo sa pagpakamatay niini.
Disyembre 13, milupad si Digos Mayor Joseph Peñas didto sa Marawi aron personal nga itunol ang hinabang pinansyal sa mga biktima sa gubat sa gobyerno ug mga terorista. Apil sab nga gigahinan og tabang ang mga biktima sa linog sa Surigao City.
Nalambigit sab sa kasaysayan sa lalawigan ang unang anibersaryong gisaulog sa mga sakop sa Lesbian, Gay Bisexual and Transgender (LGBT) Prode of Digos niadtong Disyembre 19.
Sud ning bulan, daghang kinabuhi ang namatay ug nakalas sa pagsud sa duha ka bagyong Urduja ug Vinta sa ubang lugar apan dako ang pasalamat sa katawhan sa duha ka lalawigan nga wa’y kinabuhing naangol ug nakalas atol sa mga pagbaha dinhi.
Nagpaabot sab ang katawhan sa lalawigan sa pahasubo ngadto sa matag pamilya sa 38 ka mga namatay nga call center agents sa Survey Sampling International (SSI) human masunog ang NCCC Mall of Davao niadtong Disyembre 23.
Pipila lamang kini sa mga istoryang atong gibalikan sa duha ka lalawigan atol sa pagtak-op ning tuig 2017 human napatik na kini sa kasaysayan ug di na unta masubli sa moabot nga tuig.
Luyo sa mga trahedyang nasinati sa ubang pamilya nagpabilin gihapon ang pagpahiyom ug pagtabang sa ubang adunay grasya, anaa sab ang pag-ampo ug pagsalig sa kahitas-an dungan sa pagpasalamat sa maayong panglawas ug malinawong pagsugat sa tuig 2018.