NIKUNHOD ang mga nabuthan atol sa pagsugat sa Pasko ug Bag-ong Tuig base sa datus nga natala sa Regional Epidemiology and Surveillance Unit (Resu) sa Department of Health (DOH) 7.
Niubos ngadto sa 16.6 porsyento ang natala sa Resu 7 sukad niadtong nagsugod silag tala atol sa Pasko hangtod sa Enero 2 kagahapon sa alas 11:00 sa buntag.
Niabot sa 54 ang samdan sa pabuto diin usa niini samdan sa saag nga bala, itandi sa 63 niadtong nakalabay nga tuig diin duha niini ang naigo sa saag nga bala.
Nag-una gihapon ang Cebu City nga aduna’y daghang natala nga nabuthan diin niabot sa 15 ka mga tawo ang samdan, usa niini naigo sa saag nga bala.
Gisundan kini sa siyam ka mga biktima sa dakbayan sa Mandaue ug walo sa dakbayan sa Lapu-Lapu.
Anaa sa 4-anyos ang natala nga labing bata nga naangol diin 88-anyos usab ang labing hamtung.
Duha usab ang natala nga naputol ang parte sa lawas human mabuthan, usa niini sa Sugbo ug Bohol.
Sa 54, niabot sa 43 niini gikan sa Sugbo, unom sa Bohol ug lima5 sa Negros Oriental.
Sagad sa gigamit nga pabuto kining piccolo, bamboo cannon, binggala, candy bomb, flare, fountain, kwitis, skyrocket, triangle, whistlebomb ug uban pa.
Sa dakbayan sa Talisay, usa ka bala nitugpa sa higdaanan sa usa ka 28 anyos nga lalaki nga nagpuyo sa sitio Nonoc, Barangay Tabunok atol sa pagsugat sa Bag-ong Tuig.
Si Lloyd Cantones, ulitawo, nagpuyo sa maong lugar, nakadiskubre sa wa matino nga slug nga sa iyang higdaanan alas 12:45 sa tungang gabii.
Matod ni PO1 John Xyrus Ilustrisimo sa Talisay City Police Station nga base sa ilang imbestigasyon, ang bala gikan sa ibabaw human nabuslot ang atop sa ilang balay.
Nagkanayon si Ilustrisimo nga suwerti si Cantones tungod kay dugay usab nga natulog niadtong higayona tungod kay nagsaulog sa Bag-ong Tuig.
Ang slug gidala sa kapulisan aron ipasusi kon unsa kini nga klase sa armas.
Samtang duha ka mga menor de edad ang nidangat sa Talisay City District Hospital human napaso ug nabuthan nianang buntag na sa Bag-ong Tuig.
Usa sa mga biktima giila nga si Melvin Boiser, 6, taga Barangay Tanke.
Matod ni PO1 John Xyrus Ilustrisimo nga nangulekta og pabuto nga nikagar samtang gitapok ang mga pulbura apan nisilaub ang pulbura nga nipaso sa sa iyang lawas.
Samtang laing bata ang midangat usab nga si Justin Pausa, 10, nabuthan sa piccolo.
Sa dakbayan sa Lapu-Lapu, pulos whistle bomb nga pabuto maoy naka-angol sa upat ka mga tawo sa managlahing dapit atol sa pagsugat sa Bag-ong Tuig ug nadangat sa Lapu-Lapu City Hospital.
Matod ni Marites Matsumoto, duty desk information officer, nga pulos minor injury ang naangkon sa mga biktima gawas niadtong 29 anyos nga ulitawo sa iyang mata nituasik ang pulbora hinungdan nga gitambagan nga magpakonsulta og ophthalmologist sa Vicente Sotto Memorial Medical Center.
Samtang ang labing bata nga nakaangkon og paso sa iyang tuong kamot mao ang 8 anyos nga si Gerald Villaganas Gerali, taga Purok Nangka Lumoy, Gun-ob nga matod pa nagsansan sa mga salin nga pulbora nga giingong mikayo resulta sa pagkapaso sa tuo niya nga kamot.