Garcia: Bayung Banwa, Nanung Pamagbayung Gewa Mu?

“Alang bage e miyayalilan nung e mu ing pamagbayu.” ~ Heraclitus

“Ginu, pagkaluban Mu kung kapanatagan bang atanggap ku la ring bage e ku abayu, ing sikanan-lub bang abayu ku la ring bage agyu kung alilan, at ing katenakan bang abalu ku ing pamiyaliwa ra.” ~ Reinhold Niebuhr

“Ing pamandagul maplas. Ing pamagbayu maplas. Dapot, alang lakwas pang maplas nung e ing pamandatila nung nu ka e makaparikil.” ~ N. R. Narayana Murthy

“Nung e ka mamalit tataluntunan, mekad miras ka king paynturwan mu.” ~ Lao Tzu

“Deng mung pekamatenakan at ding peka-misdan ila ring e magbayu.” ~ Confucius

*****

ALANG taung e mibiblas agyang asna kalambat ing pamamiblas da reng aliwa. Mibiblas tamu bang namnaman ing panamdam ning bayu, ning pamagbayu at ing nyaman ning nanu mang bage bayu. Mabanglu ya ing bayu. Malinis ya. Manyaman yang anting bayung agtal a bungang melulut keng impun. Malutung-lutung ya pa.

Alang e bisa king sagiwa. Alang e bisa king bayu. Nung atin man, deti ring kakalawat king kapanwalan dang maligaya la king sadya, king luma o king mebangnas na. Nanu lang uri deng taung antita? Mekad ating manyaman a mebangnas na. Buru!

Oneng keraklan king miburu e ya mabanglu. Sasalingalngal ing pepakaslam a yumu sadya o ing linipas a kasagiwanan na. Mebilasa ngara pin deng aliwa.

Bayu. Bayung imalan. Bayung sapin. Bayung saken. Bayung bale. Bayung segana-gana. Bayu ngan ing sabla dapot alang mibayu keng panugali o sadyang gawi. Mekad mibayu pin dapot mipakarok naman. Mitas ka puluk. Mapagmalati na ka. Mapangaya na ka. Paratut na ka. Bala mu ika na ing pekabyasang-dili keti king mabilug a yatu o mabilug a sikluban.

Karayu mu na kanitang kayanak-anakan mu pa. Kanita kababa mu lub. Kanita lakwas maralas ing pamaniman mu. Mayli ka parati. Mapamiru ka pa. Atin ka pang panaun karing aliwa. E ka magdili-dili keng labwad mu. Buri mu ing ating kakyalung. Buri mu in gating kasabi—katalamitan.

Masaya ka kanita.

Malagu ing segana-ganang makapalibut keka. Mabanglu la ring sampaga at kaburi mong uman tunggal-tunggal. Kaburi mung libut-libut king taldawa. Kaburi mu lang pagumasdan ding miyayaliwang ayup, ing aluntyang paligid at pati na ring biga king iro banwa.

E ka pa maselan kanita.

Maglakad ka agyang makatapak ka mu. Pula-pulandit ka karing pilapil. Asna ka kaburing manakit at sasake kareng Bangka. Pati na karing lamung sapwang-sagin. Makisamsaman ka pa king takad uling buri mu ikang magpasulung. Kakawe ka kareng sapa agyang malabug ing danum at e na ka bisang sumaka uling tutu kang matula agyang marinat ing pikawen mu.

E ka mamiling akakayabe. Tuturing mo kanitang kakaluguran ding balang akit mu keng dalan. Ala kang pipilinan agyang kalulu la o mabandi la man. Buri mu mu ing atin kang akakyalung, akakasabi dikil karing daralanan mung bage e mu ataruk, e mu asanak at e na pa apapagsisti ning mapaglati at mapangabiran mu nang isip ngeni.

Dakal na ing migbayu king bye mu.

Meyari na kang magaral at makapanintunan na ka. Masikan na kang manakitan. Papaynum kang alak balang tanggapn mo reng upa mu. Ika na ing tatangalan da ring pakakalulu mung kakilala a e mu na tuturing kapante ngeni.

Bayung Banwa na. Bayu na ing bye mu naman. Nanu naman kaya ing migbayu king panugali mu? Mipakayap o mipakarok?

*****

Dake Talabaldugan:

1. kimút – (palagyu) galo, mayna o bagyang galo. English–slight motion. Alimbawa king pamangamit: “Ditak man ala yang kimut ikit da ing bayung sapwak a pungul inya bala ra mepatad ne inawa.”

2. kimpé – (panguri) singkul, komang, pile, pisuk. English–crippled or injured in the extremities of hands or feet. Alimbawa king pamangamit: “Agyang kimpe ya gamat i Tatang Andung asne naman kabyasang manurud.”

3. kimpút – (palagyu) panyalap/pandakap paro. English–conical net or rattan trap for shrimps. Alimbawa king pamangamit: “Metung n’ya mung mitagan a byasang gawang kimput at ita king Dalayap n’ya mu mayayakit.”

4. kimutkimutan – (palagyu) paling, sumangiran lele ning lupa libutad ding mata at balugbug. English–temples. Alimbawa king pamangamit: “Neng mimisip tamung malalam sasakit tamu kimut-kimutan uli atang karin la reng uyat a magagamit.”

5. kinákapatid – (palagyu) mengaring kapatad keng tegawan. English–relation between godson or goddaughter and the children of the sponsors in baptism, confirmation or marriage. Alimbawa king pamangamit: “Matibe ing lugud nang Iru kang Ambu agyang e la man tune mikamaganak at kinakapatid n’ya mu keng kumpil kang tata na.”

*****

IRIYANG KAPAMPANGAN: Nung kanung nanung gawan ning ninu man keng mumunang aldo ning Bayung Banwa ya nang gawan na mu naman kilub ning pabanwa. Inya sa’t sasabyan da king ninu mang gawang nanu mang bage king aldo iti—pabanwa kang teterak kanyan nung teterak ya king mumunang aldo ning Bayung Banwa. Nanu man ing sangkan o ba’t makanyan ing ing kapanwalan da reng pipumpunan tamu masakit pamatulusan.

*****

Agkatan da kang mambag o midake nanu mang Kapampangan a kawatasan, sanese, sisti, kasuryan o nanu mang dikil king Kapampangan. Nanu mang kutang o sisti dikil king Kapampangan a misulat king Kapisik, malyaring ikutang o malinawan king talasulat.

Pakiparala king email address, garciakragi@yahoo.com. E ne pu makibat keng text ing Kapisik uling megamit ya lagyu keng kapamiraytan. Nung karapatdapat ya’t makayagpang king dalerayang tuntunang Kapisik, masa kang mirinang kapakibatan at milimbag ya sanu man kareng tutuking dangka ning Kapisik. Ipisik me pamu, abe!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph