GIPASALAMATAN og dako sa kagamhanang lokal sa Cagayan de Oro ug Misamis Oriental nga mihinay ug mitipas si Bagyong Agaton nga gikatakda unta ng moigo dinhi sa siyudad sa Cagayan de Oro niadtong Lunes sa gabii.
Kini tungod kay basi sa Weather Forecast sa Philippine Atmospheric, Geophysical and Astronomical Services Administration (Pagasa) kagahapon sa alas 5:00 buntag, ang Bagyong (Tropical Depression) Agaton adunay gamay nga pagkusog samtang nitabok kini sa Bohol Sea nga gikahupay sa mga nabalaka nga mga Kagay-anon nga masublian ang pagbaha niadtong Bagyong Vinta nga daghan pa ang wala maka-recover.
Ang sentro sa Bagyong Agaton adunay gilay-ong 95 kilometro sidlakan (east) nga bahin sa Tagbilaran City, Bohol.
Kini adunay kakusgong 55 kilometers per hour (kph) ug nagalihok 25 kph Kasadpan (west) nga bahin ganihang 4:00 sa sayong kabuntagon.
Ang Northern Mindanao maka-sinati lamang sa panalagsang pag ulan inubanan sa unuson nga hangin tungod sa Bagyong Agaton.
Sa adlawng Huwebes gikatakdang mogawas na sa area of responsibility sa nasod ang bagyo.
Forced evacuation
Gumikan kay ubos sa Signal Number 1 ang Cagayan de Oro ug Misamis Oriental walay gitugotan nga biyahe sa barko niadtong adlawng Lunes samtang kadtong mga lugar nga doul sa kasubaan ang pwersang gipabakwit aron malikay sa halapad nga pagbaha.
Sa Misamis Oriental moabot s 308 ka pamilya ug 1,303 ka mga indibidwal ang pwersadong gipabakwit diin nagikan kini lungsod sa Talisayan; Sugbongcogon; Kinoguitan; Claveria ug siyudad sa El Salvador.
Si Provincial Disaster Risk Reduction Management Department (PDRRMD) head Jun Vicente Dy nibutyag nga mapasalamaton sila sa paghinay sa bagyo ug pagtipas niini.
Gani iyang gipaabot nga labihan ang ilang gihimong pagpangandam niadtong gabii sa bag-ong tuig ug gipangmonitor ang mga lugar nga delikado sa landslide lakip ang mga residente nga nagpuyo kilid sa suba.
Gipaniguro usab nila nga sa pagpauli sa mga bakwit aduna silay mga relief goods nga madala.
Mismong si Misamis Oriental Governor Yevgeny Vincente Emano nakabantay sulod sa PDRRMD office aron pagsiguro nga luwas sa bisan unsang kalamidad ang probinsya.
Denhi sa siyudad sa Cagayan de Oro mokabat s 84 ka pamilya kon 211 ang namakwit gikan sa Barangay Cugman, Puerto ug Macanhan ning siyudad.
Si City Disaster Risk Reduction Management Chief Allan Porcadilla nipaabot sa iyang pasalamat sa tibouk team nga anaa gyod nakamonitor ug nakabantay sa siyudad sa unta paghapak ni Bagyong Agaton.