Luzano: Eksena 2017 para 2018

AGSUKAT manen ti tawen ngem saan nga aglupos kadagiti panawanna a kontrobersiya. Arig dagitoy ti aniniwan a sumursurotto latta sadino man a destino ti pagdas-alam. Intay man taliawen ti napalabas, kailian:

*****

Gapu iti panangsalaknib ni Pres. Duterte iti Marawi City manipud iti kuko dagiti terorista, inaramatna ti kas rebbengna nga addang saan laeng a dita no di ketdi iti entero a Mindanao. Indeklarana ti martial law iti likud dagiti pammabalaw ken panangumsi. “I told you, do not force my hand into it,” ballaagna idi Mayo, 2017. “I’d be harsh, I have to do it to preserve the Republic of the Philippines and the Filipino people.” Impasingked ni Digong a dinto agabuso ti martial law nangruna iti human rights ket agtalinaed ti limitasyon ti Konstitusyon. Nagleppas ti giyera ti Marawi idi Oktubre 23, 2017. Ngem gapu ta kasapulan, babaen iti rekomendasyon ti AFP ken PNP, kiniddawda ti ekstensiyon wenno pannakapawayway pay ti martial law iti Mindanao. Inaprubaran met ti Kongreso ti ekstension agingga no Disyembre 31, 2018. Iti agdama, adda iti Korte Suprema ti kiddaw kontra iti deklarasyon a baro.

*****

Iti tawen 2017 met laeng a nakanselar ti peace talks. Opisyal a pinugsat ni Pres. Duterte ti gannuat a saritaan-talna-ken kapia iti baet ti gobyerno ken CPP-NDF-NPA gapu kano iti awan ressat a panatambang dagiti rebelde nga NPA kadagiti puersa ti gobyerno. Pinirmaan ni Digong ti Proclamation No. 360 idi Nobyermbre 23, 2017. Simmaruno a nangiparuar ti presidente iti mas nadagdagsen manen a proklamasyon – Proclamation No. 374 a nangideklara kadagiti rebelde kas terorista a grupo a kagiddan ti mandamiyento de aresto kadakuada iti sidong ti Human Security Act – HAS. Natural a sinakit ti nakem dagiti makakanigid ti proklamasyon. Nagballaagda met iti kontra operasyon wenno gubat wenno gubat nga operandi. Maryusep, imbes a lumamiis ti tensiyon, ad-adda ketdin a bimmara. Danag ti nagari iti amin a disso iti pagilian nangruna kadagiti pagrarairaan dagiti komunista.

*****

Naklaat dagiti umili idi insubli ni Duterte ti akmen kontra droga manipud iti PDEA- Philippine Drug Enforcement Agency. Ngem nailawlawag met laeng a ti PDEA met laeng ti lead-agency idinto ta support met ti PNP ken dadduma pay nga enforcement agencies. Adu ti nagiing iti dayta nga addang ti presidente. Amangan kano ta agsubli manen dagiti pammapatay a kaadduan kadagiti biktima ket dagiti laeng babassit a sida wenno nakukurapay a maatap a user ken pusher. Ngamin kadagiti kallabes nga oplan kontra droga, awan big fish wenno napeklan ken higante a drug Lords ti napadso. Sakuntipda ngarud: an-anuem ngarud nga ibusen dagiti babassit wenno nakukurapay a biktima ti illegal a droga no di met mapung-ir ti gammat dagiti buklis a dio-diosen. Kunada pay: dagita a lords ti akin-biktima kadagiti nagsebba iti droga, dagita koma ti umuna a madusa iti nadagsen. Dagiti users, kunada arigda met laeng ti biktima dagita a buwaya. Ala, agalertotayo ngarud a mangsurot kadagiti addang nga ipakat dagiti otoridad kontra droga iti daytoy baro nga addang – Tokhang 2 wenno ania?

*****

No panggep iti tensiyon iti nagbaetan ti Pilipinas ken Tsina gapu laeng iti teretoryo iti West Phil sea….medyo naklaat ni Chinese President XiJinping iti kellaat kano a panagbaliw iti takder ni Pres. Duterte iti South China Sea. Inlawlawag ngamin ni Duterte a kas chairman iti ASEAN – Association of southeast Asian Nations ita a tawen…rumbeng nga itemkanna ti takder ken panirigan dagiti pagilian a miyembro iti ASEAN. Kinagiddan met dita, gapu iti ASEAN Summit idi Nobyembre a naangay ditoy pagilian…naipakita iti lubong ti nadekket a panagsinnakit dagiti Superpowers a sumupsuporta iti Pilipinas. Kuna ngarud ni Russian Prime Minester Dimitry Medvedev a nakasagana ti pagilian a Russia a tumulong iti adbokasya ti Pilipinas kontra terorismo. Nagpinnirma dagiti dua a pagilian (Russia ken Pilipinas) iti pito a napagnumuan a gannuat kas sidelines ti 31st ASEAN Summit. Nakadidillaw met ti kasla limmukay a tensiyon iti baet ti Pilipinas ken estados Unidos kalpasan a timmaripnong ni US Pres. Tramp iti nakuna a summit. Sapay koma ta dinton umalsem manen ti nasam-it a situasyon. Kunada ngarud…ni laeng kano sigud a presidente ti US ti kinagura ni Digong. Haayyy kasda la ubbing, kuna dagiti makaawat. Ngem kasla agririaw ti kararua daydi lolok: nangato ngamin ti paturayokyo isu nga adu’t mabuisbuisit kadakayo, pwe! Ammoyo no ania ti PATURAYOK a kuna ni lolok? Mataas ang ihi !

*****

Iti daytoy met laeng a tawen a naibutaktak ti panangawat ni Pres. Digong iti diaya ti pamilya-Marcos nga isublida ti kinabaknangda iti gobyerno ti Pilipinas tapno agtalna kanon dagiti isyu ken kontrobersiya. Ngem adu ti simngaw a sayangguseng, saludsod ken basnot. Kunada: no agisublida kano…kaawatan ngarud nga adda innalada, saan aya? Pangalaanda ngarud iti dakkel a kantidad, kas maibase iti kinabaknang a kamkamaten ti gobyerno kadakuada, no kadagiti naglabas a panpanawen ket impatangkenda nga awan tinakawda? Ngem apay a maki-aregloda? Tapno malpasen ti sigalot? Dipay naresolba daytoy a kontrobersiya. Nakanganga pay laeng ti kaputotan ni Juan dela Cruz no sadino ti paginggaan ti nakuna nga isyu. Arasaas: saan aya nga apa ti pamilya Marcos ken Aquino ti nangtimon iti mas nadagdagsen a parikut nga agpapan ita ket simumulagat pay laeng dagita a tensiyonda? Angawda ngarud: nia ngata no adda koma ramotda (Marcos/Aquino) ti aginnayat kas iti pelikula…mapunasto ngatan ti lamma ti sakit nakem dagita a pamilya? Kabaelan ngata ni AYAT a solbaren ti rimmamuten a saket ti nakem? Kuna ngarud daydi lolok: kabaelan ti pammateg wenno ayat a patangkenen ti natangkenen ken paluknengen ti naluknengen. Medyo nauneg ti kapanunotam, lolo. Basta ti matarusanmi, no nalukneng…mayat, ngem maymayat no natangtangken. Sus, inangko a muldagat…pakpakawan ta kasla pimmuslit manen ti utek a killo ni lolok.

*****

Itoy met laeng a tawen a napasingkedan ti baro a linteg panggep iti panagbuwis. Adu ti naragsakan, ngem adu met ti timmubngar. Adda kano pagimbaganna dayta a linteg ngem adu met pagdaksanna. No matulongan kano dagiti marigrigat iti panagbuwis, ti naimpedna, mapan met laeng a gastuenna iti ngimmato a kantidad ti serbisyo ken komersiyo. Kinagiddan met dita ti panangdutok ni Digong kadagiti baro a kameng ti gabinetana kas koma kada sigud a sexy performer Mocha Uson kas Presidential Communications Operations Office (PCOO) assistant secretary for social media; Harry Roque kas baro nga spokesperson; retired AFP chief Gen. Eduardo Ano kas DILG secretary; ken Sen. Allan Cayetano kas DFA secretary. Ngem iti ungto dagita a pannakaipuwesto, adu met dagiti inikkat ni Digong iti uneg ti gobyerno. Ti imasna, tay inikkatna idi idiay BOC a ni Faeldon…insublina manen kas Deputy head ti OCD. Maryusep…adu latta dagiti kontrobersiya, kabsat. Surotentayo ida ita a tawen, 2018. Happy New Year! Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph