SA paghapak sa bagyong Agaton niadtong miaging adlaw sa lalawigan sa Sugbo nakamugna kini og dakong danyos gumikan sa baha ug landslide nga nahitabo sa habagatang bahin sa lalawigan. Matod pa duha ang gikatahong namatay sa lungsod sa Malabuyoc.
Ang mga biktima mao sila si Flora Andrade, 63, kinsa namatay human matabunan sa nalusno nilang panimalay sa Barangay Looc. Nalusno ang panimalay ni Andrade niadtong Martes sa kadlawon human usab kini maigo sa bato gumikan sa landslide duol sa ilang panimalay. Naugkat ang lawas ni Andrade.
Ikaduhang namatay mao si Richie Pimentel, 39, kinsa nahagbong ug napantok ang ulo sa batuon nilang yuta. Nahagbong si Pimentel gumikan kay naligas sa ilang hagdanan human mikanaog nunot sa paghapak sa kusog nga hangin og ngitngit niadtong higayona kay gipawong ang supply sa elektrisidad gumikan sa kakusog sa hangin.
Apan ang taga Provincial Disaster Risk Reduction and Management Office (PDRRMO) dili mokonsiderar nga typhoon related ang hinungdan sa kamatayon ni Pimentel kay ang hinungdan sa iyang kamatayon mao ang pagkahagbong niya. Ngano god tawon?
Pagkayabag nang nga opisyales diha sa PDRRMO. Nahagbong tuod si Pimentel apan unsa may hinungdan sa iyang pagkahagbong? Mimata siya gumikan sa kakusog sa hangin. Gipawong ang kuryente kay kusog ang hangin. Mumata kaha ug mokanaog si Pimentel sa iyang panimalay kon dili pa kusog ang hangin? Dili lang tutukan nato ang iyang kamatayon kon dili ang hinungdan ug ang background sa iyang kamatayon.
Gusto siguro nga ipagawas sa taga PDRRMO nga dili i-konsiderar nga typhoon related ang kamatayon ni Pimentel aron ingnon nga minimal ang nahimong danyos sa bagyo. Aron ingnon nga nakapangamdam sila og maayo. Mga yabag mo diha.
(bobbygnalzaro@gmail.com)