SECTIONS
Friday July 20, 2018

Isaiah gisugat og kadaugan

BISAN sulod sa pito ka mga buwan nga wala siya nakaduwa, gipakita ni Isaiah Thomas nga wala matay-i ang iyang abilidad ug iyang natabangan ang bag-o niyang team nga mao ang host Cleveland Cavaliers sa pagbuntog sa Portland TrailBlazers, 127-110, kagahapon sa National Basketball Association (NBA).

Si Thomas, kinsa nakasinati og angol sa iyang bat-ang niadtong Mayo 19 dihang nagduwa pa siya sa Boston Celtics sa miaging season, nimugna og 17 puntos lakip na niini ang tulo ka three-point shots sulod sa 19 ka mga minutos nga pagduwa aron tabangan ang Cavaliers nga makabangon gikan sa tulo ka sunodsunod nga kapildihan.

Ang Cavaliers mingsaka sa 25-12 nga rekord samtang ang TrailBlazers nahagsa sa 19-18 nga baraha.

“It’s been a long journey for me,” matod ni Thomas. “I couldn’t really see the light at the end of the tunnel. For that day to come the first couple days of 2018, it’s going to be a special year.”

Si Thomas mipahuway ug wala na mobalik og duwa sa nahabiling 8:10 minutos diin niadtong higayuna, naglabaw ang Cavaliers og 12 puntos.

Sa wala pa siya mibiya sa korte, gigakos si Thomas sa labing sinaligan sa Cavaliers nga si LeBron James ug hasta ni coach Tyronne Lue.

Ang Cavaliers, nga gikan sa kapildihan batok sa Golden State Warriors, Sacramento Kings ug Utah Jazz, gipangulohan ni James pinaagi sa iyang 24 puntos, nidugang og 19 puntos si Kevin Love samtang niamot og 15 puntos si Jae Crowder.

Ang TrailBlazers gipangulohan ni Damian Lillard pinaagi sa iyang 25 puntos, nihatag og 23 puntos si Jusuf Nurkic samtang nitampo og 19 puntos si CJ McCollum.

Si Thomas misulod sa korte sa labing unang higayon isip sakop sa Cavaliers sa nahabiling 4:33 minutos sa 1st quarter. Miabiba og maayo ang mga tumatan-aw sa magduduwa nga ilang gituohan nga makatabang og dako aron makabira og laing titulo ang Cavaliers.

“It was a special moment,” dugang ni Thomas.

Si James mipabuhagay sa iyang dakong pagdayeg sa kinaiya ni Thomas, kinsa dakong tipik sa trade nga nagpabalhin kang Kyrie Irving sa Celtics.

“What I like most about him is he has a chip on his shoulder for life,” paghulagway ni James kang Thomas.

“That’s just who he is. When a guy’s got a chip on his shoulder for life, he’s never going to not work hard. Not going to never give it his all. Not going to never disappoint you.”

Ang Cavaliers nakabiya lang og dako sa TrailBlazers dihang nagkumboya sila si Thomas ug Dwyane Wade sa pagsugod sa 4th quarter.

Sa laing mga duwa, ningdaog ang San Antonio Spurs batok New York Knicks, 100-91, Phoenix Suns batok Atlanta Hawks, 104-103, Charlotte Hornets batok Sacramento Kings, 131-111, ug LA Clippers batok Memphis Grizzliers, 113-105. (AP, ESL)


VIEW COMMENTS