SECTIONS
Friday July 20, 2018

Delos Reyes: Politika sa dakbayan sa Davao ug sa rehiyon

MALIPAYONG Bag-ong Tuig sa tanang ka Super.

Daghang Pinoy ang misugat sa Bag-ong Tuig dala ang paglaum nga mahimong hamugaway ang ilang kinabuhi karong 2018. Mao sab kini ang panglantaw ni Kongresista Karlo Alexei Nograles, House Committee Chair on Appropriations sa 17th Congress tungod sa daghang mga proyekto nga gikan sa P3.8- trillion nga budget sa gobyerno alang sa tuig 2018.

Daghang trabaho tungod sa administrasyon ni Pres. Rodrigo Duterte pinaagi sa buhatan sa Department of Public Works and Highways nga gigahinan og P637.86 billion nga Build, Build, Build program nga moabot sa P8.1 trillion sugod 2017 hangtud 2022.

Ang buhatan sa Department of Education ang ikaduha nga gigahinan og budget sa kantidad nga P553.31 billion. Matuman na sab ang pagpataas sa suweldo sa mga pulis ug sundalo nga gisaad ni Pres. Duterte niadtong panahon sa iyang pagpangampanya.

Ugaling mahinayon ang mid-term eleksiyon sa 2019 dako ang mahimong kalahian sa eleksiyon sa dakbayan sa Davao kay mideklara na ang kampo ni Nograles nga dili na sila makig-atbang sa mga Duterte sa bisan unsang posisyon.

Tungod mahuman na ang tulo ka termino ni Cong. Karlo Nograles usa siya sa ginaandam sa PDP-Laban nga usa sa 12 ka mga kandidato pagka-senador. Kon buligan sa kapalaran ang batan-on nga Nograles maoy unang senador nga taga dakbayan sa Davao. Siya sab ang nangumbinsi sa iyang mga kauban sa Kongreso nga motapon ug mosuporta kang Duterte sa iyang pagdagan pagka-Presidente.

Maayo ang record ni Cong. Karlo diin nailhan siya sa iyang mga proyekto sa libre nga edukasyon nga mokabat na kapin sa 30 mil ang nahimo niyang scholar. Siya sab ang nagduso sa libre nga edukasyon sa mga State Colleges and Universities sa nasud.

Sutoy pa sa kuwetis si Atty. Manases Mans Carpio kon matinuod nga siya ang padaganon sa kampo sa Duterte pagka- mayor sa dakbayan sa Davao kay kinsa man ang magpaalig-alig nga makig-atbang kay wa pa may lain nga nagparamdam nga modagan.

Carpio-Duterte gihapon apan lahi na nga mga personahe kay si Baste Duterte ang gihugon-hugon nga mahimong ka-tandem ni Mans.

Hinuon giingon ni Mayor Inday Sara Duterte-Carpio nga posible nga magpapili gihapon si Pulong o mobalik human siya mi-resign niadtong adlaw sa Pasko.

Kon mahimong bugnaw ang natad sa politika sa dakbayan sa Davao, lahi ang mamahimong kahimtang sa Davao del Norte tali sa kampo sa mga Del Rosario-Floirendo kontra sa kampo ni House Speaker Pantaleon Alvarez.

Kahinumdoman nga nagkabangi ang duha ka mga suporter ni Presidente Duterte sa Davao del Norte ug naugkat ang ilang mga personal nga mga isyu ug wa na magkauli ug posible nga dili na magkauli pag-usab.


VIEW COMMENTS