NAGPABUTO ra man gihapon Ikalima ka adlaw sukad nagsugod ang bag-ong tuig. Di pa ulahi kon motimbaya ko og bonggang bonggang ‘bulahang bag-ong tuig,’ mga suking magbabasa.
Kinahanglan usab gayod nga ubanan og bonggang bonggang paningkamot ang tanan natong mga pangandoy aron ato kining makab-ot. Kon di man gani tibuok gyud inig human sa tuig, basta kay dunay makita nga agi ug basin malantaw na ang katumanan.
u25cf ● ●
Abi gyud nakog parehas sa Pasko, di na kaayo ta mapugwat ug ma-igpot matag karon ug unya tungod sa mga makabungog nga buto ug lagubo. Mao ra man diay gihapon. Wa man mahadlok nga dakpon ang magpabuto ug ang namaligyag pabuto. Hinaut lang nga kon itandi sa niaging mga tuig, dyutay ra ang nasamad ug nasakitan.
May paglaum ba gyud kaha nga mahunong ang pagpabuto ug mawagtang na ang pagpabuto? Di ko sure.
u25cf ● ●
Lahi sa nahaunang mga bulan sa 2017 nga di molabay ang semana ang wa koy matan-aw nga sine (kini ra man sab ang akong matawag nga ‘bisyo’), kon wa moabot ang katapusang adlaw sa Disyembre, di sab ko makatan-aw og sine.
Kini tungod kay mas daghan ang mga adlaw nga akong gigahin didto sa lalawigan kay sa dakbayan. Ang una ug katapusang sine nga akong nakita sa Disyembre mao ang Ang Larawan nga gibidahan nila ni Joanna Ampil ug Rachel Alejandro isip magsuong si Candida ug Paula.
Mga pamilyar nga mga nawong sama nila ni Nanette Inventor, Noni Buencamino, Dulce, Zsa Zsa Padilla, Menchu Lauchengco-Yulo ug uban pa apil sa maong musical movie.
Nalingaw ko pero duna lay mga bahin nga puol ang tono sa mga kanta. Mora bag gihatagan lang og tono aron malahi sa ordinaryong paglitok sa mga linya.
Nindot hinoon ang pelikula ug di katingad-an nga nakadaug kini isip best picture sa 2017 Metro Manila Film Festival (MMFF).
u25cf ● ●
Mas ginindotan ko sa Siargao nga maoy ikaduha nakong natan-aw sa MMFF. Nindot ang istorya, ang mga talan-awon, ang pag-arte sa mga artista labina sama nila ni Jericho Rosales, Erich Gonzales, Enchong Dee, Jasmin Curtis-Smith ug Suzette Ranillo.
Ang esena diin naghangop ang inahan ug anak nga gidala nila ni Suzette ug Jericho nakapatandog nako. Daghang nindot nga mga linya nga gibuhi-an ang mga artista.Maayong pagka dirihir ni Paul Soriano ug di gihapon katingad-an nga nidaug siya isip best director. Makapanganga ang mga aerial, underwater ug panoramic views nga nihulagway sa Siargao isip tourist destination.
Bisan ang paglukot sa balud nga maoy kinaham sa mga surfing enthusiast maayo kaayong pagkakuha sa camera. Mas nalingaw ko aning pelikulaha.
Ang akong tahas karon mao ang paghurot og tan-aw sa nahibiling mga pelikula, kon di pa mahurot ang budget. Paet!