KON ikaw gibati og kalaay ug nangita og kalingawan niining unang buwan sa tuig 2018, di na kana problema. Suroya ang The Carnaval Fantasy Big Boom sa Sugbo sa Kasadya sa South Road Properties (SRP).
Gihulagway nga ang edisyon sa Kasadya sa SRP karong tuiga maoy labing alegre, bibo ug makalingaw sa tinuig nga kalihukan nga gipahigayon sa SRP.
Si Emmanuel Ongkiko, kinsa maoy nagdumala sa Bigboom sa Sugbo, nagkanayon nga adunay 27 ka carnival rides ang ilang itanyag sa mga bisita nga buot makabaton og kalingawan.
Sa pagsud nimo sa carnival, adunay P25 nga one-use entrance alang sa mga nag-edad og 4 anyos pataas diin seguradong malingaw ilabi na ang mga bata sa nagkalainlaing klase sa rides.
Labing kinaham nga rides sa mga dagko mao ang gitawag og UFO, diin ang magsakay daw maglutaw ug ituyoktuyok sa ibabaw sa kawanangan.
Anaa usab silay bumper boat, bumper car, octopus, spider, space lab, pirate ship, galactic, twister, lantern wheel, horror both ug alang sa mga bata anaa ang bobbin bee.
Ang bayad sa matag rides nagkantidad gikan sa P30 ngadto sa P60 diin giulagway ni Ongkiko nga seguradong malingaw ang mga bisita.
Gawas sa rides, naa sab silay kalingawan nga ipasundayag sanglit nagama sila og dako nga entablado alang sa matag presentasyon.
Di usab angay ma-problema ang mga bisita sanglit adunay mga pulis, bouncer, 12 ka CCTV cameras alang sa seguridad ug public address system aron dali ang pagpandangat og impormasyon.
Matod ni Ongkiko, karong Enero 19, mo-perform ang Rocksteddy, usa ka banda gikan sa Manila, ug ubanan sa Phylum, ang sikat nga Bisrock band sa Sugbo. Sa Enero 20 ug 21, adlaw sa Sinulog, molusad sab sila og dako nga kalingawan alang sa mga bisita.
Di problema kon ikaw maabtan og kagutom samtang magsuroysuroy sa Kasadya sa SRP sanglit aduna sab silay mga food stall nga mahimong makan-an.
Aduna sab silay dako nga espasyo alang sa parking diin ang motor adunay bayad nga tag P10.
Alang sa mga tawo nga naguol kay wa silay masakyan paingon sa Kawit island sa SRP, di na kana problema sanglit ang Cebu City Government nitanyag og libreng sakay sa mga bus nga manukad sa Barangay Mambaling ug Cebu City Hall.
Ang Carnaval Fantasy Big Boom sa Sugbo mag-abli 5 p.m. ngadto sa 2 a.m., gikan Disyembre 8 hangtod Pebrero 28 ning tuiga.
Ang Paps Production kinsa nagdumala karon sa Kasadya sa SRP maoy nakadaog sa public bidding sa kantidad nga P3.6 milyones alang sa dul-an tulo ka buwan nga carnival.